Governu Timor-Leste

Epizódiu ba dala 26 hosi programa “Página do Governo” nian sei fó sai iha loron-sesta semana ida ne’e, tuku 7 kalan iha Rádiu no Televizaun Timor-Leste (RTTL) no iha plataforma komunikasaun ofisiál sira Governu nian. Konvidadu iha edisaun ne’e mak Sekretáriu Estadu Pekuária, José Vieira de Araújo, ne’ebé sei ko’alia kona-ba polítika públika, prioridade, no dezafiu sira ne’ebé setór pekuária hasoru iha Timor-Leste. 

Durante entrevista, sei aprezenta inisiativa prinsipál sira Governu nian atu hametin setór pekuária, inklui haforsa produsaun animál, hadi’a saúde no saneamentu animál, promove seguransa ai-han, no kontribuisaun hakiak animál ba dezenvolvimentu ekonómiku no sosiál komunidade rurál sira.

Konversa iha entrevista ne’e destaka mós medida sira hodi apoia produtór sira, prevensaun no kontrolu ba moras animál sira, hametin indústria pekuária, dezenvolve sistema sira produsaun kooperativa no komersializasaun nian, nune'e mós habelar produsaun susu-been nasionál no nia kontribuisaun potensiál ba nutrisaun infantil liuhosi integrasaun susu-been ne'ebé produz lokalmente iha programa sira merenda eskolár nian.

Programa "Página do Governo" hanesan inisiativa ida hosi Gabinete Portavós Governu nian, ne'ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL no mídia nasionál sira. Programa ne’e nia objetivu  atu reforsa transparénsia governativa no garante sidadaun sira-nia asesu ba asaun no desizaun prinsipál sira Ezekutivu nian. Programa ne'e konta ho Nélia Chaves nu'udar aprezentadora no Ika Moniz nu'udar produtora ezekutiva. Apoiu tékniku fornese hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne'ebé hetan entrevista.

Governu konvida populasaun tomak atu akompaña edisaun “Página do Governo” ida-ne’e, iha sesta-feira, loron 21 fulan-agostu tinan 2026, oras tuku 7 kalan, iha RTTL no mídia sosiál sira.