Governu Timor-Leste

JAKARTA, 12 Agostu 2026 – Sekretáriu Estadu Arte no Kultura (SEAK), Jorge Soares Cristóvão, akompaña husi Embaixadór Extraordináriu no Plenipotensiáriu Timor-Leste ba Indonézia, Roberto Sarmento de Oliveira Soares, ho delegasaun, ohin loron hala’o enkontru kortezia ho Ministru Kultura Indonézia nian, Fadli Zon, iha Jakarta, hodi koalia kona-ba kolaborasaun no kooperasaun bilaterál entre pais rua Timor-Leste no Indonezia, ba futuru dezenvolvimentu Arte no Kultura nian.  

Sorumutu ne’e foka liu ba habelar kolaborasaun entre Timor-Leste no Indonézia liuhosi troka koñesimentu, perísia téknika, no inisiativa kulturál ne’ebé sei kontribui ba prezervasaun, promosaun, no dezenvolvimentu patrimóniu kulturál nasaun rua nian. Diskusaun sira mós reafirma ligasaun kulturál no istóriku sira ne'ebé maka fahe hosi nasaun viziñu rua ne'e. 

Rezultadu prinsipál ida husi enkontru ne’e mak kompromisu mútuo atu finaliza no asina Nota Entendimentu (MoU) entre Ministériu Kultura Repúblika Indonézia no Sekretaria Estadu Arte no Kultura Timor-Leste. Akordu ne'e hein atu estabelese enkuadramentu formál ida ba kooperasaun iha área sira inklui prezervasaun kulturál, dezenvolvimentu muzeu sira, biblioteka sira, interkámbiu kulturál sira, kapasitasaun, no promosaun indústria kriativu sira. 

Iha diskusaun sira ne’e, Ministru Fadli Zon hato’o mós kompromisu Indonézia nian atu fó apoiu tékniku ba implementasaun no dezenvolvimentu institusionál Muzeu Nasionál no Biblioteka Nasionál Timor-Leste nian. Asisténsia ne'e hein atu inklui fahe perísia, formasaun profisionál, no kooperasaun téknika hodi hametin infraestrutura kulturál nasaun nian no salvaguarda ninia patrimóniu dokumentál no istóriku. 

Projetu Biblioteka Nasionál, ne’ebé nia konstrusaun ofisialmente hahú iha Jullu 2026, hanesan inisiativa kulturál estratéjiku ida hosi Governu Timor-Leste nian ne’ebé ho objetivu atu prezerva patrimóniu dokumentál nasaun nian, apoia edukasaun no peskiza, no fornese ba jerasaun futuru sira ho asesu boot liután ba koñesimentu no rejistu istóriku sira. 

Sekretáriu Estadu Jorge Soares Cristóvão fó benvindu ba kompromisu Indonézia nian, hodi subliña katak kooperasaun rejionál ne’ebé forte liu iha kultura kontribui la’ós de’it ba prezervasaun identidade nasionál maibé mós ba relasaun kle’an entre ema ho ema, troka koñesimentu, no dezenvolvimentu kulturál ne’ebé sustentável iha Sudeste Aziátiku tomak. 

Aleinde enkontru ne’e, koalia mos kona-ba nota entendimentu ka Memorandum of Understanding (MoU), ne’ebe mak atu asina entre Ministru Kultura Indonezia ho Sekretariu Estadu ba Arte no Kultura. Sorumutu kortezia ne’e reflete kompromisu komun entre Timor-Leste no Indonézia atu hametin liután relasaun bilaterál liuhosi kultura, reforsa kooperasaun ne’ebé fó benefísiu ba nasaun rua enkuantu prezerva no promove sira-nia patrimóniu kulturál ne’ebé sai riku ba jerasaun sira iha futuru.REMATA