Governu Timor-Leste

Havana, Cuba – Agostu 2026-Governu Repúblika Demokrátika Timor-Leste informa katak  Vise-Ministru ba Asuntu Parlamentár (VMAP), S.E. Adérito Hugo da Costa, reprezenta Governo Timor-Leste, hola parte iha 1º Colókiu Internasionál “Fidel: Legadu no Futuru”, ne’ebé hala’o iha Havana, Repúblika Cuba, husi loron 10 to’o 13 Agostu 2026. 

Kolókiu internasionál ida-ne’e organiza hodi komemora séntenáriu moris Fidel Castro Ruz, liuhosi inisiativa hosi Sentru Fidel Castro Ruz, hamutuk ho instituisaun akadémika no kulturál sira iha Cuba. Eventu ne’e halibur líder polítiku, diplomata, akademiku, istoriadór, jornalista, peskizadór, estudante, artista, líder sosiál no reprezentante movimentu solidariedade husi nasaun oioin iha mundu. 

Objetivu prinsipal hosi kolókiu ne’e mak atu reflete no analiza kontribuisaun Fidel Castro Ruz iha área polítika, sosiál, internasionál no umanista; nia influénsia ba movimentu libertasaun nasionál no Países Sul Global; no relevánsia hosi nia hanoin iha hasoru dezafiu kontemporáneu, inklui desigualdade, mudansa klimátika, imperializmu, pás, soberania no autodeterminasaun povu sira.

Kolókiu ne’e mós sai nu’udar espasu ida ba diálogu entre memória istórika, dezafiu atual no aspirasaun jerasaun foun sira, liuhosi debate kritiku no pluralista kona-ba legadu Fidel Castro Ruz no nia kontribuisaun ba hanoin kontemporáneu. 

Durante kolókiu, partisipante sira sei diskute área temátika oioin hanesan Revolusionáriu no Estadista, Ideolojia Fidel Castro Ruz (análize kona-ba nia diskursu, hakerek no métodu análize polítika no sosiál), Fidel no Mundu (nia kontribuisaun ba polítika esterna Cuba, luta ba pás no dezarmamentu mundiál, Movimentu Países La-Alinhadu no relasaun Sul-Sul), Legadu Umanista no Internasionálista (edukasaun, siénsia, kultura, saúde, desportu, igualdade, dignidade umana no solidariedade internasionál), Fidel iha Sékulu XXI (relevánsia hosi nia hanoin iha hasoru dezafiu atual, inklui krize ambientál, komunikasaun polítika, rede sosiál dijitál no intelijénsia artifisiál), Legadu Kultural (Fidel iha literatura, cinema, músika, arte vizuál no memória populár), Estratejista Militár (hanoin militár, independénsia nasionál no solidariedade internasionál), Fidel no Anti-Imperializmu (soberania, autodeterminasaun no luta kontra neokolonializmu) no Unidade nu’udar Estratéjia (integrasaun, solidariedade no kooperasaun internasionál). 

Partisipasaun S.E. Adérito Hugo da Costa iha eventu internasionál ida-ne’e reflete amizade no solidariedade ne’ebé Timor-Leste no Cuba harii durante tinan barak, no mós vontade atu kontinua haforsa relasaun bilateral no kooperasaun entre nasaun rua. 

Relasaun Timor-Leste no Cuba iha istória ida ne’ebé importante, liuliu iha área edukasaun no saúde, inklui apoiu no kooperasaun iha formasaun estudante Timoroan iha Cuba. Kooperasaun ne’e sai parte importante hosi ponte amizade entre povu Timor-Leste no povu Cuba.

Partisipasaun VMAP nian mós fó oportunidade atu promove diplomásia parlamentár, liuhosi troka hanoin no esperiénsia ho reprezentante parlamentár, polítiku no diplomátiku husi nasaun sira seluk, ho objetivu atu haforsa entendimentu, solidariedade no kooperasaun internasionál.

Durante VMAP nia prezensa iha Havana, Vise-Ministru ba Asuntu Parlamentár uza oportunidade hodi kumprimenta mós lideransa polítika, diplomátika no parlamentár Cuba, hodi reafirma apresiasaun Timor-Leste ba amizade no solidariedade ne’ebé eziste entre Timor-Leste no Cuba. 

VMAP mós hasoru delegasaun Guiné-Bissau no reprezentante husi nasaun seluk, ne’ebé fó oportunidade atu haforsa rede relasaun no solidariedade entre nasaun sira ne’ebé iha istória, kultura no lian Portugés hanesan ponte komún.

Iha oportunidade seluk, Vise-Ministru ba Asuntu Parlamentár halo enkontru kortezia ho Embaixadór Repúblika Demokrátika Timor-Leste iha Cuba, S.E. Nívio Leite Magalhães, hodi hatudu apresiasaun ba servisu diplomátiku ne’ebé Embaixada hala’o iha reprezentasaun no promosaun interese Timor-Leste iha Cuba.

Vise-Ministru mós aproveita oportunidade atu hasoru estudante no bolseiru Timoroan sira ne’ebé hela no estuda iha Cuba.

Iha enkontru ne’e, VMAP hato’o motivasaun ba estudante sira atu kontinua dedika an ba sira-nia estudu, mantein disiplin no aproveita di’ak oportunidade formasaun ne’ebé sira hetan iha rai liur, tanba sira sei sai parte importante hosi futuru dezenvolvimentu Timor-Leste.

VMAP mós hato’o apresiasaun ba esforsu no kontribuisaun estudante Timoroan sira, no subliña katak koñesimentu no kapasidade ne’ebé sira hetan tenke bele fó kontribuisaun ba dezenvolvimentu nasaun bainhira sira fila fali ba Timor-Leste.

Iha programa vizita, Vise-Ministru ba Asuntu Parlamentár mós vizita Sentru Fidel Castro Ruz, fatin ida ne’ebé rai no prezerva dokumentu, objetu, imajen no memória istórika kona-ba moris, luta no atividade polítika Fidel Castro Ruz.

Vizita ne’e fó oportunidade atu haree diretamente dokumentasaun no patrimóniu istóriku ne’ebé relasiona ho vida no legadu estadista Cuba nian, no atu komprende di’ak liután konteúdu istóriku no polítiku ne’ebé sai baze ba diskusaun iha kolókiu internasionál ne’e.

Partisipasaun Timor-Leste iha kolókiu internasionál ida-ne’e hatudu kompromisu Governu Timor-Leste atu kontinua envolve an iha diálogu internasionál, promove amizade entre povu sira no haforsa kooperasaun ho nasaun parseiru.

Governu Timor-Leste konsidera katak diplomásia parlamentár iha papél importante atu komplementa esforsu diplomásia ofisiál, liuhosi diálogu, troka esperiénsia, konstrusaun konfiansa no promosaun entendimentu mútuu entre nasaun sira.

Partisipasaun iha 1º Colókiu Internasionál “Fidel: Legadu no Futuru” nune’e sai oportunidade ida ba Timor-Leste atu afirma nia prezensa iha fórum internasionál, promove perspetiva nasional no kontinua haforsa relasaun amizade no solidariedade ho povu no Governu Cuba. REMATA