Governu Timor-Leste

Ohin, loron 06 fulan-agostu tinan 2026, iha Palásiu Governu, Dili, Ministru Prezidénsia Konsellu Ministru, Agio Pereira, hasoru malu ho reprezentante hosi Polísia Federál Austrália (AFP), Superintendente Detetive Darren Boyd-Skinner, Ofisiál Superiór husi Austrália nia Programa Dezenvolvimentu Polísia Timor-Leste (TLPDP), hodi ko’alia kona-ba hametin kooperasaun hodi kombate esplorasaun online ba labarik sira iha Timor-Leste. 

Durante enkontru, diskute kona-ba dezafiu sira ne'ebé asosiadu ho protesaun ba labarik sira iha ambiente dijitál no nesesidade atu hametin kapasidade instituisaun nasionál sira nian hodi prevene, investiga, no responde ho efetivu ba tipu krime ida-ne'e. Sorumutu ne’e mós importánsia hosi aprosimasaun koordenada entre entidade sira ne'ebé responsavel ba seguransa, justisa, protesaun sosiál, no apoiu ba vítima.

Enkontru ne'e mós permite atu halo análize ba kooperasaun téknika no inisiativa sira kapasitasaun nian ne'ebé ho objetivu atu hametin kapasidade nasionál sira, inklui peskiza dijitál, jestaun evidénsia eletrónika, no fahe esperiénsia internasionál sira hodi kombate esplorasaun online hasoru labarik sira.

Ministru Agio Pereira reafirma kompromisu Governu nian hodi hametin kooperasaun interinstitusionál no internasionál, hodi promove mekanizmu sira ne’ebé efetivu liu ba protesaun labarik no garante resposta adekuada ida ba dezafiu sira ne’ebé hamosu hosi krime dijitál.

Polísia Federál Austrália haktuir hikas  vontade atu kontinua fó apoiu ba Timor-Leste liuhosi formasaun espesializada, asisténsia téknika no fahe koñesimentu, hodi kontribui ba dezenvolvimentu kapasidade nasionál sira iha área ida-ne’e.