Ministru Agio Pereira hala’o sorumutu ho Embaixadóra Singapura iha Timor-Leste Teo Lay Cheng
Dili, Timor-Leste — Ministru Prezidénsia Konsellu Ministrus, Agio Pereira, ohin, loron 4 fulan-Agostu tinan 2026, iha Palásiu Governu, hala’o sorumutu ho Embaixadóra Singapura iha Timor-Leste, Teo Lay Cheng, iha enkontru ida ne’ebé fó dalan ba sira atu reafirma forsa relasaun bilaterál entre Timor-Leste no Singapura no esplora oportunidade foun sira ba kooperasaun iha área sira interese komún nian. 
Iha sorumutu ne’e, ko’alia kona-ba oportunidade atu aprofunda kolaborasaun bilaterál iha área interese komún oioin, inklui dezenvolvimentu sustentável, kapasitasaun institusionál, formasaun rekursu umanu, inovasaun, modernizasaun estadu, no dezenvolvimentu ekonómiku.
Ministru subliña importánsia relasaun ho parseiru internasionál sira ne'ebé fahe vizaun hodi promove dezenvolvimentu no hametin kapasidade nasionál sira, hodi destaka esperiénsia Singapura nian iha governasaun, teknolojia, inovasaun, no dezenvolvimentu abilidade sira.
Iha reuniaun ne’e parte rua mós troka perspetiva sira kona-ba oportunidade sira iha koperasaun nian iha setór enerjétiku, ho énfaze iha jestaun sustentável hosi rekursu naturál sira no kriasaun hosi valór nasionál. Ko'alia mós kona-ba dezafiu rejionál nian no globál sira ne'ebé ezije kooperasaun internasionál ne'ebé boot liu.
Ministru Ágio Pereira destaka mós Timor-Leste nia interese atu kontinua hetan benefísiu hosi esperiénsia Singapura nian, partikularmente iha reforsu kapasidade institusionál sira, prepara ba jerasaun foun sira, no dezenvolve abilidade sira hodi hasoru dezafiu sira iha futuru nian mai.
Enkontru ne'e akontese iha kontestu ida ne'ebé maka aumenta aproximasaun entre nasaun rua ne'e. Singapura loke embaixada rezidente ida iha Dili iha Abril 2024, no Teo Lay Cheng aprezenta ninia kredensial sira ba Prezidente José Ramos-Horta iha Abril 2026.
Sorumutu ne’e reforsa kompromisu Timor-Leste no Singapura nian atu kontinua dezenvolve relasaun ida ne’ebé bazeia ba amizade, respeitu malu, no fahe koñesimentu, hodi kontribui ba oportunidade foun ba kooperasaun ne’ebé fó benefísiu ba nasaun rua ne’e nia povu.
