Sekretáriu Estadu Eletrisidade, Bee no Saneamentu Partisipa iha gravasaun edisaun foun husi programa “Página do Governo”
Dili-Ohin, loron 4 fulan-agostu tinan 2026, Epizódiu foun husi programa TV “Pájina Governu” ne’ebé grava ona iha Palásiu Governu Dili, hamutuk ho Sekretáriu Estadu Eletrisidade, Bee no Saneamentu, Santos Noronha. Diskusaun ne’e foka liu ba prioridade Governu nian ba setór eletrisidade, implementasaun projetu infraestrutura estratéjiku, kooperasaun ho parseiru dezenvolvimentu sira, no koordenasaun ho Ministériu Obras Públikas (MOP) hodi hametin sistema enerjétiku nasionál Timor-Leste nian. 
Durante entrevista ne’e, Sekretáriu Estadu destaka kompromisu Governu nian atu garante servisu eletrisidade ne’ebé konfiável, sustentável, no asesivel iha nasaun tomak liuhosi implementasaun projetu infraestrutura prioridade sira ne’ebé apoia dezenvolvimentu nasionál no hasa’e kualidade moris populasaun nian. 
Diskusaun ne'e foka ba progresu hosi projetu estratéjiku oioin ne'ebé maka hala'o daudaun, inklui Projetu Fotovoltaiku Solar (PV) Laleia, ne'ebé maka hakarak aumenta parte hosi enerjia renovável sira iha sistema eletrisidade nasionál no hamenus dependénsia hosi kombustível fósil sira. Entrevista ne’e mós ko’alia kona-ba instalasaun kabel eletrisidade subterránea iha Bidau no Becora, no mós espansaun planeadu ba rede distribuisaun subterránea ba área sira seluk nu’udar parte ida hosi estratéjia Governu nian ba tempu naruk atu hadi’a seguransa, konfiabilidade, no reziliénsia rede eletrisidade nian.
Sekretáriu Estadu destaka mós importánsia hosi konstrusaun no espansaun ba sub-estasaun Comoro no Camea hodi hasa’e kapasidade transmisaun no distribuisaun eletrisidade, hodi permite rede nasionál atu hatán ba ezijénsia enerjétika ne’ebé aumenta.
Aleinde ne'e, implementasaun Projetu Drenajen 4D aprezenta hanesan inisiativa infraestrutura krusiál ida hodi proteje instalasaun eletrisidade estratéjiku sira hosi inundasaun no hadi'a reziliénsia infraestrutura públika nian. 
Entrevista ne’e subliña liután kontribuisaun valiozu hosi parseiru dezenvolvimentu sira hodi apoia Governu nia ajenda setór enerjétiku. Liuhusi kooperasaun téknika, asisténsia finanseira, no fahe koñesimentu, parseria sira-ne’e kontinua aselera implementasaun projetu estratéjiku sira no hametin kapasidade institusionál ba dezenvolvimentu sustentável setór eletrisidade nian. 
Sekretáriu Estadu mós ko’alia kona-ba koordenasaun besik ne’ebé mantein ho Ministru Obras Públikas hodi garante katak projetu infraestrutura eletrisidade integra ho efetivu ho polítika dezenvolvimentu infraestrutura nasionál. Entrevista ne'e aborda dezafiu prinsipál sira setór nian, inklui habelar asesu ba eletrisidade ba komunidade sira ne'ebé dook, moderniza infraestrutura ne'ebé tuan ona, hametin reziliénsia sistema nian, no asegura prestasaun efisiente ba servisu públiku sira ho kualidade aas iha nasaun tomak.
Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál Ezekutivu nian.
Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne'ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne'ebé hetan entrevista.
Epizódiu ne’ebé konta ho Sekretáriu Estadu Eletrisidade, Bee no Saneamentu sei fó sai iha tempu badak iha RTTL no liuhosi plataforma ofisiál sira mídia sosiál Governu nian. 
