Governu Timor-Leste

DILI, 30 Jullu 2026 - Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, hala’o enkontru kortezia ho Ministru Ekonomia no Koezaun Territoriál Portugal, Manuel Castro Almeida, no Adjunta Ministru Ana Sofia, iha Gabinete Vise-Primeiru-Ministru, Farol, Díli, iha Kinta-feira, 30 Jullu. Enkontru ne’e fó atensaun ba hametin kooperasaun bilateral iha área dezenvolvimentu ekonómiku, investimentu, turizmu no área prioridade sira seluk ne’ebé bele fó benefísiu ba nasaun rua. 

Durante enkontru ne’e, Vise-Primeiru-Ministru reafirma katak Portugal kontinua sai parseiru importante ida ba Timor-Leste no subliña kompromisu Governu nian atu habelar kooperasaun ekonómika, kria oportunidade foun ba investimentu no promove kresimentu ekonómiku sustentável. Nia mós destaka importánsia akordu kooperasaun iha área turizmu ne’ebé foin asina entre nasaun rua.

Ministru Ekonomia no Koezaun Territoriál Portugal, Manuel Castro Almeida, hato’o apresiasaun ba relasaun metin entre Timor-Leste no Portugal no reafirma prontidaun Portugal nian atu kontinua servisu hamutuk ho Timor-Leste hodi promove dezenvolvimentu ekonómiku, turizmu no kooperasaun iha setór prioridade sira.

Ministru Portugal nian mós subliña importánsia turizmu nu’udar motor ba kresimentu ekonómiku, hateten katak turizmu bele lori reseita boot, valoriza rekursu lokál sira, prezerva kultura no tradisaun, no suporta dezenvolvimentu turizmu ne’ebé ho kualidade.

Rezultadu importante ida hosi enkontru ne’e mak asinatura Akordu Kooperasaun Formasaun iha Área Turizmu ba Períodu 2026–2028 entre Vise-Primeiru-Ministru Dato' Seri Francisco Kalbuadi Lay no Ministru Ekonomia no Koezaun Territoriál Portugal, Manuel Castro Almeida. Akordu ida-ne’e iha objetivu atu hametin kooperasaun iha área formasaun turizmu entre Timor-Leste no Portugal.