Governu Timor-Leste

DILI, 31 Jullu 2026 — Primeiru-Ministru Kay Rala Xanana Gusmão inaugura Sentru Espiritualidade Inaciana ba Dame no Rekonsiliasaun iha Hera, Munisípiu Dili, iha sesta-feira, 31 Jullu, iha ambitu selebrasaun Festa Santo Inácio de Loyola. Nia hateten katak inaugurasaun ida-ne’e la’ós de’it abertura instalasaun foun ida, maibé mós reprezenta kompromisu foun Timor-Leste nian atu hametin valór fiar, dame, solidariedade no respeitu ba ema hotu. 

Primeiru-Ministru hateten katak istória Timor-Leste hanorin katak dame la hetan ho fasil, maibé presiza sakrifísiu, perseveransa, perdaun no vontade atu rekonstrui relasaun entre ema sira. Nia mós hateten katak, maski povu Timoroan liu ona hosi tinan barak hosi sofrimentu no konflitu, liuhosi fiar ba Maromak no domin ba rai ida-ne’e, konsege harii nasaun ida ne’ebé livre no soberanu.

Nia subliña katak Sentru Espiritualidade Inaciana sei sai fatin ba silénsiu, orasaun no reflesaun, no mós sei fó kontribuisaun ba formasaun konsiénsia, hametin lideransa no promove kultura diálogu. Tuir Primeiru-Ministru, dezenvolvimentu nasaun nian la bele sukat de’it hosi kresimentu ekonomia no infraestrutura, maibé tenke mós fó prioridade ba dezenvolvimentu ema liuhosi edukasaun, espiritualidade, étika no formasaun umana.

Primeiru-Ministru Xanana hato’o apresiasaun ba Companhia de Jesus (Jesuítas) tanba iha kontribuisaun naruk iha Timor-Leste liuhosi edukasaun, akompañamentu espirituál, servisu sosiál no formasaun ba juventude. Nia mós espera katak sentru ne’e sei sai patrimóniu ida ba povu Timor-Leste, nakloke ba ema hotu atu promove enkontru, diálogu, rekonsiliasaun no esperansa, liuliu ba jerasaun foun.

Iha serimónia ne’e, Sua Eminénsia Cardeal Virgílio do Carmo da Silva, SDB, hateten katak sentru ida-ne’e la’ós de’it edifísiu ida, maibé fatin ida atu ema sira hasoru Maromak, hametin sira-nia fiar no forma sira atu sai instrumentu ba dame nian. Nia mós subliña katak espiritualidade Inaciana hanorin ema atu halo disernimentu espirituál no buka Maromak iha buat hotu, atu desizaun sira lori esperansa, justisa no dame ba família, komunidade no nasaun.

Superiór Jesuíta iha Timor-Leste, Padre Erick, mós hateten katak sentru ne’e sei sai uma ida ba orasaun, silénsiu, disernimentu, formasaun no kompromisu atu promove dame no rekonsiliasaun. Nia enfatiza katak Timor-Leste presiza ema sira ne’ebé prontu atu halo diálogu, rona malu no servisu ba bem komún, tanba dame tenke harii loroloron liuhosi domin, perdaun, solidariedade no servisu ba ema seluk.

Sentru Espiritualidade Inaciana ba Dame no Rekonsiliasaun ne’ebé harii iha Hera, Munisípiu Dili, hetan apoiu hosi benfeitór no doadór katóliku sira hosi Singapura. Sentru ida-ne’e sei promove espiritualidade, dame, rekonsiliasaun no hametin relasaun entre ema sira liuhosi valór Inacianu kona-ba servisu, solidariedade no respeitu ba ema hotu.

Serimónia inaugurasaun ne’e hetan prezensa hosi autoridade Estadu sira, lider Igreja Katólika, membru Companhia de Jesus, relijiozu no relijioza sira, benfeitór sira, doadór sira hosi Singapura no konvidadu sira seluk. Remata