Governu Timor-Leste

Díli, 28 Jullu 2026 – Governu Austrália no Governu Timor-Leste reafirma fali sira-nia kompromisu atu apoia ajenda reforma ekonomia no instituisaun sira iha Timor-Leste liuhusi faze daruak Parseria ba Prosperidade Inklusivu (Partnership for Inclusive Prosperity - PROSIVU), tuir Reuniaun Komité Diretivu (Steering Committee) anual programa nian, ne'ebé lidera hamutuk husi Ministra Finansas, Santina Viegas Cardoso, no Embaixadora Austrália ba Timor-Leste, Caitlin Wilson, iha loron 28 Jullu 2026.

Hari’i husi rezultadu importante sira ne'ebé alkansa ona iha Faze Primeiru (2022–2026), PROSIVU Faze Daruak (2026–2028) sei kontinua halo parseria ho Governu Timor-Leste hodi apoia objetivu sira Timor-Leste nian, liu husi hametin instituisaun públiku sira, hadi'a jestaun ekonomia, moderniza administrasaun públika, fortalece jestaun finansas públikas no apoia integrasaun rejionál ne'ebé kle'an liu liuhusi ASEAN. Reforma sira-ne'e sei loke oportunidade ekonomia barak liu tan, hadi'a servisu públiku sira no asegura katak rekursu públiku sira fó benefísiu ne'ebé sustentável ba povu Timor-Leste.

Embaixadora Austrália ba Timor-Leste, Sua Excelénsia Caitlin Wilson, hatete katak Faze Daruak PROSIVU hatudu parseria metin no duradoura entre Austrália no Timor-Leste, no sira-nia kompromisu hamutuk atu apoia prioridade dezenvolvimentu tempu naruk Timor-Leste nian.

“Austrália no Timor-Leste iha parseria ida ne'ebé metin no dura, ne'ebé bazeia ba ita boot sira-nia kompromisu atu harii futuru ida ne'ebé dame, estável, prósperu no resiliente. Liuhusi PROSIVU Faze Daruak, ita sei kontinua servisu hamutuk atu hametin instituisaun sira, haluan oportunidade ekonomia no apoia dezenvolvimentu inkluzivu ne'ebé fó benefísiu ba povu Timoroan hotu.”

Governu Austrália mos sei kontinua apoia reforma sira atu hametin ambiente negósiu iha Timor-Leste liuhusi promosaun investimentu no komérsiu, dezenvolvimentu turizmu, rejistu negósiu online no koordenasaun reforma ekonomia. Iha Faze Daruak, programa ne'e mos sei apoia empoderamentu ekonomiku feto sira, servisu inkluzivu ba ema ho defisiénsia no hadi'a koneksaun dijitál. Prioridade importante ida mak ajuda Timor-Leste atu hetan benefísiu husi membru ASEAN liuhusi implementasaun Roteiru Komunidade Ekonómika ASEAN, kumpri padraun no kompromisu ASEAN sira, atrai investimentu no komérsiu, no fornese formasaun lian Inglez ba funsionáriu Governu sira.

Austrália nia parseira ho Ministériu Finansas sei kontinua iha hametin jestaun finansas públikas atu asegura katak rekursu públiku sira uza ho efikásia hodi promove kresimentu ekonomia Timor-Leste, kria oportunidade servisu no hadi'a servisu públiku sira. Servisu hamutuk ida-ne'e mos apoia reforma funsaun públika liuhusi apoiu estratéjiku ba Komisaun Funsaun Públika, hadi'a sistema sira no suporta dezenvolvimentu Estratéjia.

Ministra Finansas Timor-Leste, Sua Excelénsia Santina Viegas Cardoso, agradese ba Governu Austrália kontinuasaun parseria no apoiu, no dehan:

“Reprezenta Governu Timor-Leste, hau hato'o hau nia agradese ba Governu Austrália ba nia kompromisu ba servisu ida-ne'e. Hau konfia katak, liuhusi kolaborasaun ne'ebé kontinua no prioridade ne'ebé klaru, PROSIVU Faze Daruak sei lori benefísiu real ba povu Timor-Leste.”