Ministru Agio Pereira Realiza Enkontru Ofisiál Dahuluk ho Embaixadór Malázia Fairuz Rozali
DILI, Timor-Leste — Ministru Prezidénsia Konsellu Ministru, S.E. Agio Pereira, hala’o enkontru ofisiál dahuluk ho Embaixadór Malázia iha Timor-Leste, S.E. Embaixadór Fairuz Rozali, iha loron 31 fulan Jullu tinan 2026, iha sala reuniaun Prezidénsia Konsellu Ministru nian. 
Enkontru kortezia ne’e reafirma amizade metin no parseria estratéjiku entre Timor-Leste no Malázia, destaka kooperasaun bilaterál ne’ebé kleur ona no kompromisu fahe ba hametin relasaun entre nasaun rua ne’e.
Iha sorumutu ne’e, Ministru Agio Pereira hato’o benvindu ba Embaixadór Fairuz Rozali no hato’o nia apresiasaun ba Malázia nia apoiu ba Timor-Leste, partikularmente iha área integrasaun rejionál, dezenvolvimentu institusionál, no progresu nasionál.
Diskusaun sira ne’e foka liu ba Timor-Leste nia preparasaun atu asume Prezidente ASEAN nian iha tinan 2029. Ministru Agio Pereira subliña importánsia atu hetan benefísiu husi Malázia nia esperiénsia ne’ebé kle’an iha organizasaun no koordenasaun ba eventu internasionál nivel aas, inklui área sira hanesan organizasaun enkontru, lojístika, arranju seguransa, jestaun protokolu, komunikasaun estratéjiku, komunikasaun interministeriál no koordenasaun interministeriál.
Embaixadór Fairuz Rozali reafirma Malázia nia vontade atu fó apoiu ba Timor-Leste liuhosi kooperasaun téknika, inisiativa sira ba kapasitasaun, no fahe prátika di’ak liu hodi tulun nasaun nia preparasaun ba nia knaar iha futuru iha ASEAN nia laran.
Enkontru ne’e mós ko’alia kona-ba oportunidade sira ba kooperasaun liután iha área xave sira, inklui dezenvolvimentu infraestrutura, siberseguransa, kombate krime transnasionál, no reforma lejislativa sira ne’ebé ho objetivu atu hametin integridade públika, governasaun, no kapasidade institusionál.
Embaixadór Fairuz Rozali nu’udar Embaixadór Malázia ba dala hitu iha Timor-Leste dezde estabelesimentu Embaixada Malázia iha Dili iha tinan 2002. Parte rua espresa konfiansa katak parseria besik no amigável entre Timor-Leste no Malázia sei kontinua buras no kle’an liután iha tinan hirak tuir mai. REMATA
