Governu Timor-Leste

Epizódiu ba dala 25 hosi programa"Página do Governo" sei transmite iha sesta-feira, iha loron 31 fulan-jullu iha tuku 8:00 kalan. Iha Rádiu no Televizaun Timor-Leste (RTTL) no plataforma mídia sosiál ofisiál sira Governu nian. Bainaka ba epizódiu ne’e mak Sekretária Estadu ba Igualdade- SEI, Elvina de Sousa Carvalho, ne’ebé sei aprezenta Governu nia prioridade no esforsu sira ne’ebé la’o hela atu promove igualdade jéneru, hametin feto sira-nia kbiit, no prevene no kombate violénsia bazeia ba jéneru iha Timor-Leste.

Durante entrevista, Sekretária Estadu sei ko’alia kona-ba prioridade prinsipál sira husi Sekretaria Estadu ba Igualdade, inklui implementasaun polítika públika ne’ebé promove oportunidade hanesan ba feto no mane, hametin inkluzaun sosiál, no garante partisipasaun boot liu husi feto sira iha vida polítika, ekonómika, no sosiál.

Programa ne’e mós sei destaka Governu nia polítika no mekanizmu institusionál sira atu prevene no kombate violénsia bazeia ba jéneru, hametin servisu apoiu ba vítima sira, no promove kampaña sensibilizasaun públika ho objetivu atu halakon diskriminasaun no haburas kultura igualdade no respeitu.

Tópiku xave seluk ba diskusaun sei foka ba progresu ne’ebé halo ona iha redusaun dezigualdade jéneru, dezafiu sira ne’ebé sei iha, no importánsia kooperasaun entre instituisaun Governu, parseiru dezenvolvimentu, organizasaun sosiedade sivíl, no komunidade lokál sira hodi avansa igualdade jéneru iha nasaun tomak.

Sekretária Estadu mós sei fahe Sekretariadu nia vizaun no prioridade sira ba tinan sira oin mai, hodi reafirma Governu nia kompromisu atu harii sosiedade ida ne’ebé inkluzivu liu iha ne’ebé feto, mane, labarik-feto, no labarik-mane sira hetan direitu hanesan, oportunidade, no protesaun tuir lei.

Programa "Página do Governo" hanesan inisiativa ida hosi Gabinete Portavós Governu nian, ne'ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL no mídia nasionál sira. Programa ne’e nia objetivu  atu reforsa transparénsia governativa no garante sidadaun sira-nia asesu ba asaun no desizaun prinsipál sira Ezekutivu nian. Programa ne'e konta ho Nélia Chaves nu'udar aprezentadora no Ika Moniz nu'udar produtora ezekutiva. Apoiu tékniku fornese hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne'ebé hetan entrevista.

Governu konvida populasaun tomak atu akompaña edisaun “Página do Governo” ida-ne’e, iha sesta-feira, loron 31 fulan-jullu tinan 2026, oras tuku 8 kalan, iha RTTL no mídia sosiál sira.