Ministru Administrasaun Estatál Partisipa Abertura Fórum Integrasaun Enjeñeiru Munisipál
Ministru Administrasaun Estatál (MAE), Tomás do Rosário Cabral, partisipa iha abertura Fórum Integrasaun Enjeñeiru Munisipál ba munisípiu sira, Rejiaun Administrativa Espesiál Oecusse Ambeno (RAEOA), no Ataúro. Eventu loron rua ne'e hala'o iha loron 23 to'o 24 fulan-Jullu tinan 2026 iha Salaun Delta Nova. 
Forum ne'e inklui "Formasaun Jestaun Siklu Projetu Eskala Ki'ik Bazeia ba Padraun no Prosedimentu Tékniku ADN, I.P.," ne'ebé ho objetivu atu haforsa kapasidade tékniku munisipál sira iha planeamentu, implementasaun, monitorizasaun, no kontrolu kualidade projetu infraestrutura sira. Formasaun ne’e mós buka atu prepara rekursu umanu ba implementasaun desentralizasaun polítika lokál.
Durante serimónia abertura ne’e, Primeiru-Ministru Kay Rala Xanana Gusmão enkoraja munisípiu sira atu aproveita didi’ak formasaun hodi haforsa kapasidade profisionál no apoia dezenvolvimentu governasaun lokál ne’ebé forte, efisiente, no responsivu ne’ebé hatán ba nesesidade populasaun nian.
Ministru Planeamentu no Investimentu Estratéjiku (MPIE), Gastão Francisco de Sousa, destaka importánsia atu haforsa kapasidade rekursu umanu iha setór infraestrutura no garante katak projetu dezenvolvimentu sira hala’o tuir padraun tékniku ne’ebé apropriadu.
Diretór Ezekutivu Ajénsia Dezenvolvimentu Nasionál (ADN), Januário Maia Guterres, nia esplika, formasaun ne’e destina ba tékniku sira hosi Programa Dezenvolvimentu Integradu Munisipál (PDIM) no Programa Nasionál Dezenvolvimentu Suku (PNDS). Inisiativa ne’e ho objetivu atu hasa’e kapasidade téknika hodi garante projetu infraestrutura sira implementa ho kualidade, responsabilizasaun, no benefísiu sustentável ba komunidade sira.
Treinamentu ne’e halibur partisipante hamutuk 56, kompostu husi tékniku Programa Dezenvolvimentu Integradu Munisipal (PDIM) na’in 28 no tékniku PNDS na’in 28, no orador husi asesór ADN na’in neen no tékniku seniór sira. Iha konkluzaun programa nian, ADN sei fó sertifikadu ba partisipante sira ne’ebé kompleta formasaun ho susesu nu’udar rekoñesimentu ba sira-nia kompromisu ba dezenvolvimentu profisionál.
Partisipa mós iha serimónia abertura ne’e Primeiru-Ministru Kay Rala Xanana Gusmão, Ministru Planeamentu no Investimentu Estratéjiku Gastão Francisco de Sousa, Sekretáriu Estadu Dezenvolvimentu Lokál Mateus W. dos Santos Tallo, reprezentante Autoridade Munisipál sira, Autoridade RAEOA, no enjeñeiru munisipál sira husi territóriu nasionál tomak. REMATA
