Governu Timor-Leste

Timor-Leste ho Guiné-Bissau, iha loron 19 fulan Maiu, iha Palásiu Governu, Díli asina akordu bilaterál ba kooperasaun nian entre Nasaun rua ne’e, iha área hitu mak hanesan, ekonómiku, sosiál, kulturál, siéntífiku, tékniku no teknolójiku no área mina rai nian. Akordu jerál ne’e, asina hosi Ministru Negósiu Estranjeiru Timor-Leste, Zacarias Albano da Costa no Ministru Negósiu Estranjeiru Guiné-Bissau, Adelino Mano Queta.

“Objetivu hosi asina akordu ne’e atu ajuda Timor-Leste hodi bele intensifika tan koperasaun iha área barabarak hanesan ekonómiku, sosiál, kulturál, sientífiku, tékniku, teknolójiku no área minarai nian ne’ebé pais rua ne’e iha. Entre área hitu ne’ebé mak identifika, konsentra liuliu iha área minarai nian, tanba sira mós iha rekursu minarai, maske sira seidauk hahú esplorasaun, maibé ho esperiénsia Timor nian bele mós serve hanesan esperiénsia ida ne’ebé diak bá sira”, esplika Ministru Negosiu Estranjeiru, Zacarias Albano da Costa.

Iha fatin hanesan Ministru Negósiu Estranjeiru, Guiné-Bissau, Adelino Mano Queta, hateten “Akordu jerál ba kooperasaun ne’ebé ohin asina entre Nasaun rua ne’e, sei implementa no fasilita relasaun  polítika no ekonómika ne’ebé estabelese entre Guiné-Bissau no Timor-Leste,hahú hosi uluk kedas, maibé agora ne’e, ita tama ona iha faze dezenvolvimentu, atu diskute saida mak bele atu halo, bilateralmente, no bele lori benifisiu ba Nasaun rua ne’e”.