Ministru Bendito Freitas partisipa iha sorumutu informál Ministrus Negósius Estranjeirus ASEAN nian kona-ba Myanmar
Iha loron 12 fulan-jullu tinan 2026, iha Bangkok, Tailándia, Ministru Negósius Estranjeirus no Kooperasaun, Bendito dos Santos Freitas partisipa iha Sorumutu Informál Ministrus Negósius Estranjeirus ASEAN ho Ministru Negósius Estranjeirus Myanmar, U Tin Maung, ne’ebé realiza iha prezidénsia Filipinas no organiza husi Tailándia.
Sorumutu informál ida-ne’e hanesan sorumutu prezensiál dahuluk entre Ministrus Negósius Estranjeirus ASEAN no Myanmar dezde akontesimentu sira iha tinan 2021. Inisiativa ida-ne’e mosu hafoin desizaun lider sira ASEAN nian, durante Simeira ASEAN ba da-48 iha Cebu, atu fó knaar ba Ministrus Negósius Estranjeirus ASEAN hodi halo diskusaun kona-ba forma oinsá ASEAN bele mantein envolvimentu konstrutivu ida no bazeia ba prinsípius ho Myanmar, ho nafatin fiél ba prinsípius Konsensu Pontu Lima.
Hodi salienta katak Myanmar kontinua sai parte integrante husi família ASEAN, Ministrus Negósius Estranjeirus rona rezumu ida husi Ministru U Tin Maung Swe kona-ba evolusaun husi situasaun iha Myanmar.
Iha sorumutu ne’e, xefe diplomasia sira ASEAN nian troka hanoin kona-ba envolvimentu organizasaun nian ho Myanmar no analiza medidas konkreta ne’ebé posivel hodi promove hapara violénsia, diálogu konstrutivu entre parte hotu-hotu ne’ebé envolve, no mós reforsu asisténsia umanitária, bazeia ba Konsensu Pontu Lima.
