Projetu hirak ne’ebé Dezenvolvidu hela iha PNTL
Planu estratéjiku Sekretaria Estadu Seguransa nian (SES) ba dezenvolvimentu PNTL nian abranje atividade oioin. Atividade importante liu ida mak kapasitasaun Polísia sira nian. Ninia objetivu mak hasa’e kapasidade, koñesimentu no servisu ajente sira seguransa nian, maibé mós elaborasaun lei sira nian ba atuasaun ida ne’ebé di’ak no efikáz liu. Sekretáriu Estadu Seguransa subliña katak PNTL ne’e sai hanesan polísia komunitária ida, nune’e nia “tenke iha pakasidade ne’ebé aas liu atu bele servisu ho komunidade”.
Atu prepara halo rekrutamentu foun ba ajente sira ne’ebé sei halo tuir kritériu foun sira hanesan idade no jéneru kandidatu sira nian, no mós ho métodu foun hirak ne’ebé sei fasilita no halo transparente duni prosesu ne’e hotu. Formasaun ba futuru polísia sira mós sai di’ak no alargada liután.
Sai mós hanesan prioridade mak hadi’a kondisaun postu Polísia nian sira, nune’e mós ninia ekipamentu no veíkulu sira.
Iha Planu Estratéjiku SES nia prevé mós kona-ba kontinuidade Promosaun PNTL nian, nu’udar dalan ida atu bele estimula ajente sira hadi’a sira nia dezempeñu atu bele iha progresu iha sira nia karreira.
“Ho medida hirak ne’e ami motiva Polísia sira atu servisu di’ak liu hamutuk ho komunidade. Ami hakarak liu previne konflitu duké rezolve. Ba ida ne’e ami presiza kolaborasaun no tulun husi populasaun”, Francisco Guterres salienta.
Maske hili dalan atu fó liu prioridade ba prevensaun, PNTL sei kontinua atu garante uza forsa hodi rezolve konflitu sira, tanba ne’e mak kria ona forsa intervensaun nian ida, polísia rezerva, ba kazu sira ne’ebé komplikadu liu.
