Ministru Agio Pereira simu Diretór Ezekutivu no Konsellu Konsultivu Internasionál Centro Nacional Chega nian!
Iha loron 14 fulan-jullu tinan 2026, iha Palásiu Governu, Dili, Ministru Prezidénsia Konsellu Ministrus Agio Pereira simu Diretór Ezekutivu Centro Nacional Chega! Hugo Maria Fernandes, no membrus Konsellu Konsultivu Internasionál Centro Nacional Chega!, iha ámbitu vizita anuál órgaun konsultivu ne’e ba Timor-Leste. 
Iha sorumutu ne’e, Diretór Ezekutivu hato’o ba Ministru informasaun foun kona-ba atividade sira ne’ebé Centro Nacional Chega! hala’o ona hosi tinan 2025 to’o 2026, inklui dezenvolvimentu programa sira ne'ebé la'o hela no mós prioridades instituisaun nian ba tinan oinmai. Enkontru ne’e mós fó oportunidade ba membrus Konsellu Konsultivu Internasionál atu fahe sira-nia observasaun kona-ba serbisu ne’ebé instituisaun dezenvolve ona no troka hanoin ho Ministru kona-ba dezafiu no prioridade sira ne’ebé relasiona ho prezervasaun memória, promosaun direitus umanus, no implementasaun rekomendasaun sira Komisaun Akollimentu, Lia-Loos no Rekonsiliasaun (CAVR, sigla iha lian portugés) no hosi Komisaun Lia-Loos no Amizade (CVA, sigla iha lian portugés) nian.
Vizita Konsellu Konsultivu Internasionál ne’e hala'o hosi loron 12 to'o 18 fulan-jullu no nu’udar parte hosi sorumutu anuál órgaun ne’e nian, ne'ebé foka ba análize relatóriu atividades tinan 2025 nian, avaliasaun progresu hosi programa sira tinan 2026, apresiasaun ba relatóriu avaliasaun impaktu, no mós preparasaun planu asaun ba tinan 2027. Programa ne'e mós inklui konferénsia internasionál ida ho tema “Lia-Loos, Memória no Justisa: Esperiénsia Komparativa sira hosi Komisaun Lia-loos no Rekonsiliasaun nian (CVR, sigla iha lian portugés)” no mós komemorasaun aniversáriu ba dala sia Centro Nacional Chega! nian.
Konsellu Konsultivu Internasionál ne’e kompostu husi peritu sira ho esperiénsia rekoñesida iha área direitus umanus, justisa tranzisaun, memória istórika no rekonsiliasaun. Órgaun ida-ne’e ninia membru atuál sira maka Galuh Wandita Soedjatmoko (Indonézia), Sandra Marisa Martins Ramos Gonçalves (Portugal), David Scott Webster (Kanadá), Akihisa Matsuno (Japaun), Alan Michael Lapsley (Áfrika Súl), no Augusto Jr. Miclat (Filipinas), Eduardo Gonzales (Peru), Khoo Ying Hooi (Malázia), Nisay Hang (Kamboja), no Patrick Ernest Walsh (Austrália). Ninia membru sira ne’e fó akonsellamentu estratéjiku ba Centro Nacional Chega!, hodi apoia definisaun prioridades instituisaun nian no akompañamentu ba implementasaun rekomendasaun sira husi Komisaun Akollimentu, Lia-loos no Rekonsiliasaun (CAVR, sigla iha lian portugés) no Komisaun Lia-loos no Amizade (CVA, sigla iha lian portugés), nune’e mós hametin kooperasaun entre Centro Nacional Chega! ho instituisaun nasionál no internasionál sira.
Konsellu Konsultivu Internasionál Centro Nacional Chega! hetan nomeasaun ba períodu tinan tolu 2023–2026 no hala’o enkontru tinan-tinan iha Timor-Leste hodi akompaña instituisaun nia dezenvolvimentu no apoia hala’o ninia misaun hodi prezerva memória istórika, promove direitus umanus, no hametin prosesu rekonsiliasaun.
