Ministériu Justisa hala’o aprezentasaun públika kona-ba Kódigu Labarik nian
Ministériu Justisa hala’o aprezentasaun públika kona-bá Kódigu Labarik nian iha Sentru Formasaun Jurídika, Kaikoli, Dili, iha loron 17 Maiu 2011.
“Rezultadu Sensus 2010 nian hatudu katak 50% hosi ita-nia populasaun ne’e ho kategoria labarik, tanba ne’e Governu sei halo esforsu maka’as, atu proteje no promove sira nia direitu, kria kondisaun atu sira bele moris iha kondisaun ida ne’ebé mak favoravél, tanba sira mak sei hatutan moris Nasaun nian ba jerasaun sira oin mai” hateten Ministra Justisa Lúcia Lobato.
Lúcia Lobato hatutan tan katak liu hosi aprezentasaun kona-ba projetu kódigu direitu labarik nian ne’e, bele hamosu diskusaun naruk ida atu nune’e bele hadi’a sasán balun ne’ebé mak presija atu hadi’a, molok ha’u atu bá halo aprezentasaun iha Konsellu Ministrus no ikus liu sei lori ba Parlamentu Nasionál atu hetan ninia aprovasaun.”
Iha fatin hanesan reprezentante hosi UNICEF, Jun Kukita, hateten katak aprezentasaun públika kona-ba Kódigu Labarik nian ne’e, hanesan sinál kompromisu Governu ida nee nian atu haforsa labarik sira hodi goza no ezerse sira nia direitu.” Nia hatutan tan katak, Governu Timor-Leste asina tiha ona konvensaun direitu labarik iha tinan 2002, liu hosi asina konvesaun ida nee Timor-Leste kompromete atu promove, defende no proteje labarik sira-nia direitu.”
Nune’e mós Komisária Nasionál ba Direitu Labarik nian, Adalgiza Ximenes, hateten katak “tuir Komisaun nia haree katak, Governu Timor-Leste fó ona pasu ida atu sira bele tau atensaun ba labarik sira nia direitu , tan ne’e kódigu labarik nian ne’e sei sai hanesan lei ida hodi bele proteje duni labarik sira nia direitu.”
