Governu selebra Loron Nasionál ba Ema ho Defisiénsia iha Aileu no reforsa inkluzaun liuhosi akordu formasaun empreendedorizmu
Iha loron 4 fulan-jullu, Governu selebra Loron Nasionál ba Ema ho Defisiénsia liuhosi serimónia ida ne’ebé hala’o iha Munisípiu Aileu. Inisiativa ne’ebé promove hosi Ministériu Solidariedade Sosiál no Inkluzaun (MSSI) halibur reprezentante sira hosi ministériu sanulu-resin-tolu, organizasaun sira ne’ebé reprezenta ema ho defisiénsia, parseiru nasionál no internasionál sira, no mós entidade públika oioin atu reafirma kompromisu Ezekutivu nian hodi promove inkluzaun no oportunidade hanesan. 
Serimónia ne’e hetan partisipasaun husi Ministra Solidariedade Sosiál no Inkluzaun, Verónica das Dores, Ministru Juventude, Desportu, Arte no Kultura, Nelyo Isaac Sarmento, Vise-Ministra Solidariedade Sosiál no Inkluzaun, Céu Brites, Prezidente Autoridade Munisipál Aileu, João Bosco dos Santos, Prezidente Institutu Nasionál Estatístika Timor-Leste (INETL), Elias dos Santos Ferreira, no mós entidade sira seluk.
Iha ninia diskursu, Ministra Solidariedade Sosiál no Inkluzaun kongratula ema ho defisiénsia sira iha rai-laran tomak, liuliu sira ne’ebé iha munisípiu Aileu, hodi destaka sira-nia kontribuisaun ba dezenvolvimentu nasionál no temi apoiu ne’ebé fornese hosi Ministériu Solidariedade Sosiál no Inkluzaun liuhosi Subprograma Negósius Autosustentaveis ba Ema ho Defisiénsia, ne’ebé nu’udar parte hosi Programa Apoiu Pontuál.
Ministra afirma mós katak IX Governu konsidera ema ho defisiénsia nu’udar partisipante ativu iha konstrusaun no progresu nasionál, no mós rekoñese sira-nia kontribuisaun husi luta ba independénsia to’o ohin loron, hodi reafirma kompromisu Governu nian atu garante tratamentu no oportunidade hanesan ba sidadaun hotu-hotu, la haree ba sira-nia kondisaun fízika ka mentál.
Iha biban hanesan, Ministru Juventude, Desportu, Arte no Kultura rekoñese serbisu ne’ebé hala’o hosi Ministra no Vise-Ministra Solidariedade Sosiál no Inkluzaun hodi implementa programas inkluzivus ne’ebé dirije ba ema ho defisiénsia. Prezidente Autoridade Munisipál Aileu mós agradese ba sira tanba hili ona munisípiu ne’e sai uma-na’in ba komemorasaun sira tinan ida-ne’e nian.
Nu’udar parte ida husi selebrasaun ne’e, asina mós Akordu Kooperasaun ida entre Ministériu Solidariedade Sosiál no Inkluzaun (MSSI) no Institutu Apoiu ba Dezenvolvimentu Emprezariál (IADE), ho objetivu atu fó formasaun ba empreendedorizmu no jestaun nesósius ba ema ho defisiénsia ne’ebé hetan apoiu husi Programa Negósius Autosustentaveis MSSI nian.
Akordu ne’e prevee katak IADE sei hala’o atividade formasaun ne’ebé ho objetivu atu hametin abilidade jestaun emprezariál husi partisipante sira, hodi nune’e bele kontribui ba sustentabilidade negósiu sira ne’ebé hetan apoiu husi programa ne’e. Finansiamentu ba inisiativa ne’e fornese husi Ministériu Solidariedade Sosiál no Inkluzaun.
Selebrasaun Loron Nasionál ba Ema ho Defisiénsia no asina akordu ne’e halo parte iha inisiativa sira Governu nian ne’ebé ho objetivu atu promove inkluzaun sosiál, autonomia ekonómika no partisipasaun tomak ema ho defisiénsia sira nian iha dezenvolvimentu Timor-Leste nian.
