Megawati Soekarnoputri hahú vizita ofisiál mai Timor-Leste durante loron tolu
Eis-Prezidente Repúblika Indonézia, Megawati Soekarnoputri, to’o mai Timor-Leste iha kuarta-feira, loron 8 fulan-jullu, hodi hala’o vizita ofisiál ida durante loron tolu, ne’ebé hala’o to’o loron 10 fulan-jullu, tanba hetan konvite husi Prezidente Repúblika, José Ramos-Horta. Vizita ne’e ho objetivu atu hametin lasu amizade, diálogu no kooperasaun entre Timor-Leste no Indonézia ne’ebé hala’o kleur ona. 
Bainhira to’o iha Aeroportu Internasionál Prezidente Nicolau Lobato, Dili, Megawati Soerkarnoputri simu husi Prezidente Repúblika, José Ramos-Horta, no husi Primeiru-Ministru, Kay Rala Xanana Gusmão, iha serimónia ida ne’ebé marka mós prezensa husi Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, no mós entidade nasionál no diplomátika sira seluk.
Ida-ne’e nu’udar vizita daruak Megawati Soekarnoputri nian mai Timor-Leste. Antes ne’e, nia vizita iha fulan-maiu tinan 2002, bainhira nia partisipa iha serimónia Restaurasaun Independénsia Timor-Leste, hanesan Prezidente Repúblika Indonézia. Konvite ba vizita ida-ne’e fó husi Prezidente José Ramos-Horta durante enkontru ida ne’ebé hala’o iha Abu Dhabi, iha ámbitu Prémius Zayed ba Fraternidade Umana 2026, no tuirmai konfirmadu iha sorumutu ida entre sira na’in-rua iha Jakarta, iha fulan-marsu tinan ida-ne’e.
Iha vizita ne’e, Prezidente Repúblika simu Megawati Soekarnoputri iha audiénsia no sei atribui ba nia Grande Kolár Orden Timor-Leste, kondekorasaun nasionál ne’ebé aas liu, hodi fó rekoñesimentu ba ninia kontribuisaun hodi hametin relasaun amizade, diálogu no kooperasaun entre Timor-Leste no Indonézia. Prevee mós palestra ida no almosu ofisiál ida ne’ebé oferese husi Prezidente Repúblika.
Programa ne’e inklui mós omenajen ida ba eroi nasionál sira iha Jardim dos Heróis, Metinaro, nune’e mós serimónia kari ai-funan iha Semitériu Seroja, hodi fó omenajen ba militár indonéziu sira ne’ebé hakoi iha ne’ebá.
