Ministra Edukasaun reforsa parseria estratéjika ho Camões IP hodi hametin Língua Portugeza iha Timor-Leste
Iha loron 24 fulan-juñu Ministra Edukasaun, Dulce de Jesus Soares, hala’o vizita kortezia ida ba Camões – Instituto da Cooperação e da Língua, IP, iha Lizboa, iha ne’ebé reafirma kompromisu Governu Timor-Lestehodi aprofunda kooperasaun iha área edukasaun, formasaun ba profesór sira, no promosaun ba Lian Portugés. 
Iha sorumutu ne’e, Ministra agradese Prezidente Camões, Florbela Paraíba, ba resesaun ne’e no destaka papél fundamentál ne’ebé instituisaun ne’e hala’o durante tinan hirak nia laran ba dezenvolvimentu sistema edukativu Timor-Leste nian.
Iha ninia intervensaun, governante ne’e subliña katak relasaun entre Timor-Leste no Portugál bazeia ba istória komún ida, valór sira ne’ebé hanesan, no mós ligasaun kulturál no linguístika ne’ebé forte. Iha kontestu ida-ne’e, nia destaka importánsia estratéjika hosi Língua Portugeza nu’udar lian ofisiál ba Nasaun, administrasaun públika, lejizlasaun, ensinu, no mós produsaun sientífika no akadémika iha Timor-Leste.
Ministra mós rekoñese kontribuisaun hosi Camões IP hodi kapasita profesór timoroan sira, ne’ebé destaka liu Projetu PRO-Português, no nia rezultadus merese hetan rekoñesimentu no gratidaun. Maibé, nia salienta katak kontinua iha dezafiu signifikativu sira, liuliu kona-ba reforsu kompeténsia linguístika ba profesór foun sira ne'ebé tama iha tinan-tinan iha karreira dosente.
Governante ne’e rekorda katak misaun téknika foin lalais ne’e hala’o iha Lizboa hosi INFORDEPE no Ministériu Edukasaun permite hahú fali diálogu institusionál ho Camões IP no mós hahú reflesaun konjunta ida kona-ba faze kooperasaun foun ida. Kona-ba ida-ne'e, nia reafirma kompromisu forte Governu Timor-Leste nian atu kontinua serbisu iha parseria besik ho instituisaun portugeza hodi prepara programa kooperasaun foun ida ne'ebé adapta ba nesesidades atuál sistema edukativu Timor-Leste nian.
Ministériu Edukasaun hein katak, durante tinan 2026, sei dezenvolve traballu tékniku sira ne’ebé nesesáriu ba konsepsaun no formalizasaun projetu kooperasaun foun ida, ho objetivu atu hahú ninia implementasaun iha tinan 2027.
Iha ninia diskursu nia rohan, Ministra Edukasaun reafirma Governu Timor-Leste nia apresiasaun kle’an ba servisu ne’ebé Camões IP hala’o no hato’o nia disponibilidade tomak atu hametin nafatin relasaun konfiansa, amizade no kooperasaun ne’e, ba progresu edukasaun, formasaun profesór no promosaun Lian Portugés iha Timor-Leste.
