Sekretáriu Estadu Dezenvolvimentu Lokál partisipa iha gravasaun edisaun ida tan hosi programa "Página do Governo"
Sekretáriu Estadu Dezenvolvimentu Lokál, Mateus dos Santos Tallo, ohin, loron 25 fulan-juñu tinan 2026, partisipa iha gravasaun epizódiu foun ida hosi programa “Página do Governo”, inisiativa ida hosi Prezidénsia Konsellu Ministrus ho objetivu atu hakbesik sidadaun sira ba atividade governu nian, liuhosi divulgasaun polítikas, programas no prioridade sira hosi área oioin governasaun nian.
Durante entrevista, Sekretáriu Estadu aprezenta responsabilidade sira Sekretaria Estadu Dezenvolvimentu Lokál nian, ne’ebé tulun Ministru Administrasaun Estatál bainhira hala’o ninia kna’ar sira, ho destaka ninia papél iha promosaun dezenvolvimentu lokál, hametin administrasaun lokál, no mós implementasaun polítika desentralizasaun no autonomia munisipál hosi Governu Konstitusionál IX. 
Programa ne’e foka mós ba mekanizmu sira hodi promove partisipasaun komunitária no inkluzaun sosiál, no mós kona-ba prosesu elaborasaun Planu Dezenvolvimentu Komunitáriu no Planu Dezenvolvimentu Munisipál, ne’ebé nu’udar instrumentu sira ne’ebé ho objetivu atu asegura katak dezenvolvimentu ne’e bele hatán ba nesesidade no prioridade sira komunidades nian. Aprezenta mós progresu sira iha elaborasaun planu sira-ne’e iha suku no munisípiu sira.
Iha entrevista nia rohan, Sekretáriu Estadu Dezenvolvimentu Lokál husik hela mensajen ida ba komunidade no autoridade lokál sira, hodi reafirma kompromisu Governu nian atu promove administrasaun lokál ida ne’ebé besik liu ba sidadaun sira no dezenvolvimentu ida ne’ebé partisipativu, inkluzivu no sustentável iha territóriu nasionál tomak.
Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál Ezekutivu nian.
Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne'ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne'ebé hetan entrevista.
Epizódiu ho Sekretária Estadu Dezenvolvimentu Lokál, sei fó sai iha tempu badak iha RTTL no mídia sosiál sira..
Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE
