Governu Timor-Leste

Iha loron 22 fulan-juñu, Primeiru-Ministru Kay Rala Xanana Gusmão halo vizita kortezia ida ba Prezidente Repúblika Portugál, António José Seguro, iha Palásiu Nasionál Belém, iha Lizboa. Iha vizita ne’e, ko’alia kona-ba kestaun sira ne’ebé relasiona ho evolusaun situasaun internasionál no hametin liután kooperasaun bilaterál entre Timor-Leste no Portugál. 

Iha inísiu enkontru ne’e, Primeiru-Ministru hato’o saudasaun husi Prezidente Repúblika Demokrátika Timor-Leste, José Ramos-Horta ba Prezidente Portugál nian. António José Seguro, iha nia biban, hanoin-hikas kona-ba partisipasaun Xefe Estadu Timor-Leste nian iha serimónia tomada-de-pose, ne’ebé hala’o iha fulan-marsu iha tinan ida-ne’e.

Iha sorumutu ne’e, lider na’in-rua troka hanoin kona-ba evolusaun situasaun polítika internasionál no kona-ba asuntu sira ne’ebé sai interese komún. Primeiru-Ministru hato’o parabéns ba Portugál tanba eleitu nu’udar membru naun-permanente Konsellu Seguransa Nasoins Unidas nian no hato’o ninia espetativa atu nasaun ne’e kontinua promove valór sira hanesan  pás, estabilidade no dezenvolvimentu sustentável iha nivel internasionál.

Kay Rala Xanana Gusmão ko’alia mós kona-ba dezafiu sira ne’ebé Nasoins Unidas hasoru, liuliu kona-ba funsionamentu Konsellu Seguransa nian, hodi afirma nesesidade ba reformas atu organizasaun ne’e bele adapta di’ak-liu ho realidade internasionál daudaun ne’e.

Dirijente na’in-rua ne’e mós analiza kooperasaun bilaterál iha área sira hanesan justisa, edukasaun no dezenvolvimentu. Primeiru-Ministru hato’o agradesimentu ba Portugál nia apoiu kontínuu iha setór sira-ne’e no aprezenta Estratéjia Nasionál ba Ekonomia Azul Timor-Leste nian, ho identifika oportunidade sira atu hametin kooperasaun entre nasaun rua ne’e.

Ko'alia mós kona-ba situasaun iha Giné-Bissau, ho lider na'in-rua ne'e troka hanoin  kona-ba dalan sira hodi promove estabilidade polítika no hametin instituisaun sira iha nasaun ne’e.

Husi parte Portugál nian, Prezidente António José Seguro reafirma kompromisu Portugal nian atu apoia nafatin Timor-Leste iha ninia área prioridade sira ba dezenvolvimentu. Xefe Estadu portugés mós hanoin-hikas ninia envolvimentu iha inisiativa solidariedade internasionál oioin hodi apoia luta povu timoroan nian ba autodeterminasaun durante dékada 1990 nia laran.

Iha sorumutu ne’e nia rohan, lider na’in-rua ne’e reafirma sira-nia vontade atu kontinua hametin relasaun istórika kona-ba amizade no kooperasaun entre Timor-Leste no Portugál.

Primeiru-Ministru hetan akompañamentu hosi Vise-Primeiru-Ministru, Francisco Kalbuadi Lay, Ministru Justisa, Sérgio da Costa Hornai, Ministra Edukasaun, Dulce de Jesus Soares, Embaixadór Timor-Leste ba Portugál, Manuel de Araújo Serrano, Embaixadora Timor-Leste ba CPLP, Natália Carrascalão, no Xefe Gabinete  Primeiru-Ministru nian, Elizabeth  Exposto.

Primeiru-Ministru nia vizita ba Portugál inklui mós enkontru ho responsavel sira hosi área  justisa no ensinu superiór nian, no mós inisiativa sira ne'ebé relasiona ho Timor-Leste nia prezidénsia rotativa iha Komunidade País  Lian Portugés (CPLP), ne'ebé oras ne'e daudaun kaer hosi nasaun ne'e.