MSS hala’o sorumutu ho organizasaun Veteranu nian
Ministériu Solidariedade Sosiál (MSS) liu hosi Sekretaria Estadu ba Asuntu Antigus Kombatentes Libertasaun Nasionál hala’o sorumutu ho asosiasaun rezisténsia sira ne’ebé iha, hanesan ASSEPOL, FALINTIL, RENETIL no seluk tan, ho objetivu atu halo konsulta hodi forma Konsellu Nasionál Veteranu nian, ne’ebé hala’o iha loron-28-04 tinan 2011, iha salaun MSS Kaikoli Dili.
“Sorumutu ne’e atu halo konsulta ida hodi aprezenta fila fali ba organizasaun veteranu nian, atu rona sira nia hanoin no sujestaun hodi forma Konsellu Veteranu nian tuir lei no 9/2009 29-Jullu iha artigu 35, ne’ebé ko’alia kona-ba estatutu antigu kombatentes no Libertasaun Nasionál nian”, hateten Ministra Solidariedade Sosiál, Maria Domingas Fernandes.
Tuir estatutu ne’e rasik garante ona katak bainhira Konsellu Veteranu nian ne’e harii bele rezolve problema veteranu hotu-hotu,” dehan Ministra.
Iha fatin hanesan, Virgilio Guterres hosi asosiasaun ASSEPOL, haree katak, “sorumutu ne’e di’ak no urjenti atu bele ajuda rezolve problema ne’ebé oras ne’e daudaun veteranu sira hasoru, maibé atu rezolve problema la’ós atu hamosu problema foun, tanba ne’e mak presiza hanoin kle’an liu hosi diskusaun naruk atu hamosu lei ne’e.”
Nune’e mós Francisco Belo, nu’udar Sekretáriu Jerál RENETIL nian, hateten katak, “Organizasaun ka asosisaun barak ezisti tiha ona, no agora iha esbosu lei ida ba estrutura konsellu ne’e, hodi haree fila fali ba membru sira, ne’ebé ema ida-idak sei ba rejista bazeia ba estrutura hosi nivel nasionál hafoin disritál. Tanba ne’e mak ami nia opiniaun/hanoin katak konsellu ne’e mosu importante duni atu rezolve problema kombatente no veteranu sira nian.”
Tuir deputadu David Dias Ximenes, hateten katak, “Konsellu bele iha duni, maibé sei presiza iha tan diskusaun kle’an atu haree didi’ak problema sira ne’ebé organizasaun sira agora hasoru, haree mós oinsá konsellu ne’e nia papél, la’o halo nusá no kompozisaun oinsá, ne’e hotu mak foin bele determina. Importante mós mak tenke tau uluk interese nasionál, interese ema sira uluk funu na’in.”
