MSS asina Akordu ho UNTL ba estudu Mestradu
Ministériu Solidariedade Sosiál (MSS), iha loron 26 fulan Abril, iha Sentru Jovenil Taibesi, Dili asina akordu ida ho Universidade Nasionál Timor Lorosa’e (UNTL) ho objetivu atu reforsa no hametin liután prestasaun servisu sosiál iha nivél tékniku nian no kriasaun programa estudu mestradu nian iha UNTL.
“Kursu mestradu ida ne’e harii ho nia objetivu atu kapasita di’ak liután funsionáriu sira iha área seguransa sosiál, liuliu iha área rejime kontributivu ka rejime repartisaun simples nian, aleinde ne’e, funsionáriu sira mós bele foti kursu kontablidade nian no lisensiatura sira seluk”, hateten Ministra Solidariedade Sosiál, Maria Domingas Fernandes.
Osan ne’ebé sei selu ba programa mestradu ne’e hamutuk dólar rihun limanulu-resin-lima ($55.000) ne’ebé foti hosi fundu rekursu umanu MSS nian”, hatutan Ministra.
Iha fatin hanesan, Reitór UNTL, Aurélio Guterres hateten katak, polítika ida ne’e hanesan realizasaun polítika UNTL nian atu hametin liután servisu iha parte sosiál nian, liuliu seguransa sosiál, no UNTL prontu ona iha aspetu tolu hodi hala’o akordu ne’e, hanesan iha apoiu infra-esturtura, profesór kualifikadu sira nomós kuríkulu.
Tuir akordu formasaun ba funsionáriu MSS nian, liuliu iha área siguransa sosiál, sei implementa iha fulan Jullu tinan ida ne’e.
