Governu Timor-Leste

Ohin loron15 fulan-juñu, Primeiru-Ministru Kay Rala Xanana Gusmão, halo vizita ofisiál ida ba Federasaun Rúsia, iha ne’ebé nia sei partisipa iha Simeira ASEAN-Rúsia tinan 2026, ne’ebé sei hala’o iha Kazan hosi loron 17 to’o 18 fulan-juñu, iha ámbitu komemorasaun aniversáriu relasoins entre Asosiasaun Nasoins Sudeste Aziátiku (ASEAN) no Rúsia ba dala 35.

Simeira ne'e halibur lider  Estadus-membrus ASEAN, Prezidente Federasaun Rúsia, Vladimir Putin, no Sekretáriu-Jerál ASEAN, Kao Kim Hourn, atu debate kona-ba hametin parseria estratéjika entre ASEAN no Rúsia no mós esplora área foun sira hosi kooperasaun ne'ebé fó benefísiu ba malu. 

Iha reuniaun ne’e, Xefe Estadu no Xefe Governu sira sei ko’alia kona-ba tema sira ne’ebé relasiona ho seguransa rejionál no internasionál, komérsiu no investimentu, enerjia, edukasaun, teknolojia, saúde públika, konektividade, infraestrutura, no mós interkámbiu kulturál. Lider sira mós sei diskute dalan atu aprofunda kooperasaun polítika, ekonómika no umanitária entre ASEAN no Rúsia.

Durante simeira ne’e, iha loron 17 fulan-juñu sei hala'o Forum Emprezariál ASEAN-Rúsia, ne’ebé sei  halibur reprezentantes hosi setór emprezariál hodi promove oportunidades ba komérsiu, investimentu no kooperasaun ekonómika. Sekretáriu-Jerál ASEAN mós sei partisipa iha enkontru ida-ne’e, ne’ebé ho objetivu atu hametin relasaun ekonómika no emprezariál entre ASEAN no Federasaun Rúsia.

Programa ne’e mós inklui sesaun no meza-redonda ne’ebé ko’alia kona-ba relasoins entre ASEAN no Uniaun Ekonómika Euroaziátika, ho foku ba área sira hanesan saúde, enerjia, indústria, dezenvolvimentu dijitál, intelijénsia artifisiál, seguransa alimentár, lojístika, no transportes.

Simeira ASEAN-Rúsia nu’udar plataforma ida ba diálogu no kooperasaun entre Sudeste Aziátiku no Federasaun Rúsia, no marka mós tinan 35 relasoins entre parte rua.