Governu Timor-Leste

Governu Timor-Leste, liuhosi Ministériu Transportes no Komunikasoins, no Governu Reinu Kamboja, liuhosi Ministériu Korreius no Telekomunikasoins, iha loron 1 fulan-juñu tinan 2026, lansa plataforma nasionál verify.gov.tl, inisiativa ida ne’ebé ho objetivu atu reforsa seguransa, transparénsia no prevensaun ba falsifikasaun dokumentu sira. 

Plataforma ne’e dezenvolve iha ámbitu kooperasaun bilaterál entre país rua, ho asisténsia téknika Governu Kamboja nian, bazeia ba esperiénsia ne’ebé hetan ona liuhosi plataforma verify.gov.kh. Sistema ne’e uza teknolojia blockchain no kódigu QR hodi permite verifikasaun autentisidade ba dokumentus ne'ebé emite hosi autoridade kompetente sira.

Iha faze dahuluk, sei aplika plataforma ne’e ba karta kondusaun sira ne’ebé fó sai hosi Diresaun Nasionál Transportes Terrestres (DNTT). Ho utilizsaun kódigu QR, fó dalan ba autoridade kompetente sira, liuliu Polísia Nasionál Timor-Leste (PNTL), no mós sidadaun sira, bele verifika autentisidade hosi dokumentu no konfirma titulár nia identidade liuhosi telemovel.

Ministru Transportes no Komunikasoins, Miguel Marques Gonçalves Manetelu, salienta katak implementasaun ba plataforma ne’e bele realiza tanba kooperasaun ne’ebé estabelese ona entre Timor-Leste no Kamboja.

Tuir Ministru, plataforma ne'e "dezenvolve bazeia ba memorandu entendimentu ne'ebé asina iha Kamboja iha loron 20 fulan-janeiru tinan 2025". Nia hatutan tan katak, hafoin misaun téknika ne’ebé hala’o iha fulan-marsu tinan 2025 hodi avalia aplikasaun sistema iha Diresaun Nasionál Transportes Terrestres, serbisu sira ne’e konklui ona no permite lansamentu ofisiál ba plataforma ne’e.

Miguel Marques Gonçalves Manetelu esplika liután katak uza kódigu QR sei permite hodi konfirma autentisidade hosi karta kondusaun no identifika dokumentu falsu ruma. Nia mensiona mós katak, tanba karta kondusaun atuál sira-nia prazu remata, karta kondusaun sira ne’e sei troka ho dokumentu foun ne'ebé kompleta ho kódigu QR no katak, iha futuru, solusaun ne’e sei aplika mós ba dokumentu ofisiál sira seluk.

Ministru Korreius no Telekomunikasoins hosi Reinu Kamboja, Chea Vandeth, hatete katak plataforma ne’e dezenvolve iha kooperasaun ho ekipa téknika hosi país rua ne’e no esplika katak dadus ne’ebé uza hetan diretamente hosi servidór Ministériu Transportes no Komunikasoins Timor-Leste nian.

Chea Vandeth destaka katak Diresaun Nasionál Transportes Terrestres de’it mak iha asesu ba dadus ne'ebé nesesáriu ba validasaun dokumentus no subliña katak teknolojia blockchain ajuda atu asegura autentisidade no integridade informasaun nian. Nia hatutan tan katak solusaun ne'e uza ona iha Kamboja no  katak plataforma ne'e hetan ona rekoñesimentu hosi Ministrus área Dijitál ASEAN no iha forum internasionál sira ne'ebé ko’alia kona-ba transformasaun dijitál.

Lansamentu plataforma verify.gov.tl nu’udar pasu ida tan iha prosesu modernizasaun servisus públikus no transformasaun dijitál iha Timor-Leste.