Governu organiza vizita órgaun komunikasaun sosiál ba obras dezenvolvimentu no expansaun Aeroportu Internasionál Prezidente Nicolau Lobato
Iha loron 11 fulan-juñu tinan 2026, Ministériu Transportes no Komunikasoins, iha koordenasaun ho Administrasaun Aeroportus no Navegasaun Aérea Timor-Leste, EP (ANATL, EP), hala’o vizita órgaun komunikasaun sosiál ba Aeroportu Internasionál Prezidente Nicolau Lobato, Dili, hodi aprezenta progresu serbisu dezenvolvimentu no expansaun infraestrutura aeroportu nian. 
Molok hala’o vizita ba terrenu, jornalista sira partisipa iha sesaun enkuadramentu ida ne’ebé lidera hosi Xefe Gabinete no Koordenadór Unidade Jestaun Projetu (PMU) Ministériu Transportes no Komunikasoins nian, José da Costa, kona-ba situasaun jerál projetu, prosesu konstrusaun no faze implementasaun ne’ebé la’o hela.
Ekipa ne’e simu mós orientasaun kona-ba seguransa no prosedimentus asesu ba área konstrusaun sira, ne’ebé hato’o husi empreza ne’ebé responsavel ba konstrusaun ne’e.
Durante vizita ne’e, jornalista sira observa áreas ne’ebé rezervadu ba infraestruturas iha futuru, inklui estrada ne’ebé asesu ba aeroportu, terminál foun ba pasajeiru sira, torre kontrolu, área estasionamentu aeronave no área expansaun pista aterrajen, iha Zona Beto-Tasi, iha suku Madohi.
Durante vizita, Ministru Transportes no Komunikasoins, Miguel Marques Gonçalves Manetelu, esplika katak projetu ne’e hala’o tuir faze no konstrusaun ne’e sei la afeta ba operasaun normál aeroportu nian.
Ministru mós afirma katak expansaun aeroportuária la’ós limita de’it ba pista, maibé inklui mós preparasaun, relokalizasaun no adaptasaun ba infraestrutura oioin no mós servisus apoiu nian.
“Bainhira ita haree ba aeroportu ida, dala barak ema haree de’it maka pista, maibé parte ida importante husi aeroportu ne’e maka fasilidade oin-oin ne’ebé presiza prepara no muda. Tanba ne’e, prosesu ida-ne’e la’o hela no ezije koordenasaun ho parte hotu-hotu, hodi garante katak konstrusaun ne’e bele kontinua iha kondisaun di’ak”, afirma Ministru Miguel Manetelu.
Ministru hatutan tan katak eziste operasaun no servisu sira ne’ebé tenke kontinua durante ezekusaun obras, inklui prezensa aeronave sira ne’ebé estasiona iha aeroportu no mós nesesidade atu muda instalasaun operasionál balun.
Reprezentante empreza ne’ebé responsavel ba konstrusaun ne’e reafirma ninia kompromisu atu entrega projetu iha prazu ne’ebé define ona no maske iha obstákulu tékniku balun durante implementasaun, sira sei reforsa rekursus no ezekuta serbisu paralelu hodi aselera progresu konstrusaun nian.
“Ami sei kontinua halo avaliasaun no ho koordenasaun besik ho Ministériu Transportes no Komunikasoins no parte interesada sira seluk, ami bele garante katak projetu ne’e bele entrega tuir planu, iha fulan-marsu tinan 2028”, afirma reprezentante empreza nian.
Vizita ne’e permite ba órgaun komunikasaun sosiál sira atu akompaña diretamente progresu reál hosi infraestrutura estratéjika prinsipál país ne’e nian.
Dezenvolvimentu no expansaun Aeroportu Internasionál Prezidente Nicolau Lobato nu’udar parte esforsus Governu nian hodi reforsa konektividade rejionál, hasa’e kapasidade setór aviasaun no prepara Timor-Leste hodi sai uma-na’in ba eventu internasionál sira, inklui iha ámbitu ASEAN iha tinan 2029.
