Sekretáriu Estadu Florestas partisipa iha gravasaun edisaun foun husi programa “Página do Governo”
Sekretáriu Estadu Florestas, Fernandinho Vieira, partisipa ohin, loron 11 fulan-juñu tinan 2026, iha gravasaun epizódiu foun ida hosi programa “Página do Governo”, inisiativa ida hosi Prezidénsia Konsellu Ministrus ne’ebé ho objetivu atu hakbesik sidadaun sira ba atividade governu nian, liuhosi divulgasaun polítikas, programas no prioridades hosi área governasaun oioin. 
Iha entrevista ne’e, Sekretáriu Estadu aprezenta vizaun Governu nian ba protesaun no jestaun sustentável rekursus floresta, ho destaka importánsia hosi floresta ba prezervasaun biodiversidade, seguransa ambientál no dezenvolvimentu sustentável nasaun nian.
Konversa ne’e mós foka kona-ba programa reflorestasaun no konservasaun, medida sira ho objetivu atu hatán ba desflorestasaun no lakon biodiversidade, no mós estratéjias hodi hametin partisipasaun komunidade lokál sira iha protesaun rekursus naturais. Ko’alia mós kona-ba inisiativa edukasaun ambientál ne'ebé dirije ba foin-sa'e sira, ho objetivu atu hasa'e konxiénsia kona-ba importánsia hosi floresta.
Programa ne'e mós klarifika polítikas ne'ebé la'o hela hodi promove ekonomia verde no utilizasaun sustentável hosi rekursu naturál sira, no mós kontribuisaun setór florestál nian atu hamenus efeitus hosi mudansa klimátika. Entre tópiku sira ne'ebé aborda maka potensiál hosi mekanizmu finansiamentu ambientál.
Iha entrevista nia rohan, Sekretáriu Estadu Florestas husik hela mensajen ida kona-ba responsabilidade hamutuk iha prezervasaun ambiente no kona-ba papél floresta nian hodi harii futuru ida ne’ebé reziliente no sustentável liu ba Timor-Leste.
Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál Ezekutivu nian.
Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne'ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne'ebé hetan entrevista.
Epizódiu ho Sekretáriu Estadu Florestas sei fó sai iha tempu badak iha RTTL no mídia sosiál sira.
Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE
