Bombeiru Selebra nia aniversáriu ba dasanulu-resin-ida
Sekretaria Estadu Seguransa (SES) liu hosi Diresaun Nasionál Protesaun Sivíl Timor-Leste (DNPS) iha loron 23 Abríl komemora aniversáriu instituisaun Bombeiru nian ba dasanulu-resin-idak ne’ebé selebra iha loron 28 Abríl 2011 iha kuartél bombeiru, Kaikoli, Díli.
“Instituisaun Bombeiru hala’o ninia kna’ar iha área haat maka hanesan hamate ahi, servisu emerjénsia, fó sokorru ba ema ne’ebé mout iha tasi no mota no fó apoiu ba komunidade, hanesan bá tesi ai, fó bee bainhira ema presija no fó apoiu ba asidente tráfiku ne’ebé akontese”, hateten diretór DNPS, Domingos Pinto.
Diretór ne’e mós hatutan tan katak ho esforsu ne’ebé mak iha instituisaun Bombeiru konsege halo buat balun ona ho ekipamentu ne’ebé mak limitadu.Maibé buat barak mak seidauk halo, tanba ne’e ami sei haka’as an nafatin ho kbiit tomak atu hala’o kna’ar ne’e ho di’ak hodi hadi’a sistema atendimentu ne’ebé di’ak ba populasaun sira.
Iha tinan dasanulu-resin-ida nia-laran instituisaun Bombeiru harii ona iha Distritu 6, hanesan, Díli, Baukau, Maliana, Aileu, Oekuse no Manufahi. Tuir planu tinan ida ne’e atu loke tan iha Kovalima.
