Governu Timor-Leste

Edisaun ba dala 23 hosi programa “Página do Governo” sei fó-sai iha sesta-feira ne’e, iha loron 12 fulan-juñu, tuku 8 kalan, iha Rádiu no Televizaun Timor-Leste (RTTL) no mós iha mídia sosiál sira. Bainaka ba edisaun ida-ne’e maka Ministru Asuntus kombatentes Libertasaun Nasionál, Gil da Costa Monteiro “Oan-Soru”, ne’ebé sei aprezenta prioridades Ministériu nian ba tinan 2026 no mós esklarese kestaun oioin relasiona ho direitus kombatentes libertasaun nasionál, prezervasaun memória istórika, no programa apoiu ba veteranu sira. 

Durante entrevista ne’e, sei diskute kona-ba prioridades prinsipál Ministériu nian, inklui pagamentu ba pensaun kombatentes, programa inkluzaun sosiál, konstrusaun Jardín Eroi iha munisípiu sira, no mós serbisu sira ne’ebé la’o hela ba transladasaun no hakoi restus mortais kombatente sira-nian.

Dada-lia ne’e sei ko’alia mós kona-ba kritériu legál ba rekoñesimentu hosi kombatente sira no asesu ba pensaun, mekanizmu verifikasaun no prevensaun fraude nian, nune’e mós kona-ba Banco do Nosso Futuro (BNF), inisiativa ida ne'ebé ho objetivu atu promove sustentabilidade ekonómika no fasilita asesu kréditu ba veteranu sira no mós ba sidadaun sira seluk.

Tema importante seluk maka  prezervasaun ba memória luta libertasaun nasionál no mós transmisaun legadu ne’e ba jerasaun foun sira. Sei aprezenta serbisu ne’ebé la’o hela ba rekolla no validasaun dadus kona-ba timoroan sira ne’ebé mate durante luta ba independénsia, nune’e mós inisiativa sira ne’ebé dezenvolve ona hodi reforsa koñesimentu kona-ba istória nasionál.

Ministru “Oan-Soru” sei ko’alia mós kona-ba programa bolsa estudu ba veteranu no martir sira-nia oan, apoiu sosiál ba kombatente sira-nia família, no mós objetivu sira ne’ebé nia hanoin atu alkansa to’o Governu Konstitusionál IX nia mandatu remata.

Programa "Página do Governo" hanesan inisiativa ida hosi Gabinete Portavós Governu nian, ne'ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL no mídia nasionál sira. Programa ne’e nia objetivu  atu reforsa transparénsia governativa no garante sidadaun sira-nia asesu ba asaun no desizaun prinsipál sira Ezekutivu nian. Programa ne'e konta ho Nélia Chaves nu'udar aprezentadora no Ika Moniz nu'udar produtora ezekutiva. Apoiu tékniku fornese hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne'ebé hetan entrevista.

Governu konvida populasaun tomak atu akompaña edisaun “Página do Governo” ida-ne’e, iha sesta-feira, loron 12 fulan-juñu tinan 2026, oras tuku 8 kalan, iha RTTL no mídia sosiál sira.