Governu Timor-Leste

Iha loron 4 fulan-juñu tinan 2026, Primeiru-Ministru, Kay Rala Xanana Gusmão, simu Sekretáriu Estadu Adjuntu Estadus Unidus Amérika (EUA) ba Ázia Leste no Pasífiku, Michael George DeSombre, iha Palásiu Governu, Dili, ho sorumutu ida ne’ebé ho objetivu atu reforsa kooperasaun bilaterál no parseria estratéjika entre país rua ne’e. 

Vizita Michael George DeSombre mai Timor-Leste hahú husi loron 4 to’o 5 fulan-juñu tinan 2026, ho objetivu atu reafirma parseria entre Estadus Unidus Amérika no Timor-Leste, liuliu iha kontestu prioridade rejionál no globál komún.

Ministru Negósius Estranjeirus no Kooperasaun, Bendito dos Santos Freitas, akompaña Primeiru-Ministru iha sorumutu ne’e, iha ne’ebé sira ko’alia kona-ba kestaun sira relasiona ho kooperasaun bilaterál, ho foku espesiál ba hametin pás, estabilidade no prosperidade iha nivel rejionál no globál.

Durante ninia viajen mai Timor-Leste, Sekretáriu Estadu Adjuntu EUA mós hala’o sorumutu ho Prezidente Repúblika, José Ramos-Horta, hodi analiza programa kooperasaun bilaterál, situasaun rejionál, no mós partisipasaun Timor-Leste iha forum rejionál no internasionál sira.

Vizita ne’ebé koinside ho tinan iha ne’ebé Estadus Unidus Amérika komemora aniversáriu independénsia ba da-250, ne’ebé selebra iha loron 4 fulan-jullu, destaka valores ne’ebé país rua ne’e iha ein komún, maka hanesan liberdade, demokrasia, soberania no autodeterminasaun, ne’ebé sai baze ba relasaun diplomátika entre Timor-Leste no Estadus Unidus.

Michael George DeSombre asume funsaun nudár Sekretáriu Estadu Adjuntu ba Ázia Leste no Pasífiku iha fulan-outubru tinan 2025. Molok ne’e nia dezempeña funsaun iha setór privadu no Embaixadór Estadus Unidus Amérika ba Tailándia husi tinan 2020 to’o 2021. Nia iha esperiénsia profisionál  liu tinan 25 iha Ázia.

 Vizita Michael George DeSombre ne’e reafirma kompromisu Timor-Leste no Estadus Unidus Amérika atu kontinua hametin kooperasaun bilaterál no mós promove pás, estabilidade no prosperidade iha rejiaun Indo-Pasífiku.