Governu Timor-Leste

Ohin loron 2 fulan-juñu tinan 2026, halo gravasaun iha Palásiu Governu, Dili, epizódiu foun hosi programa “Página do Governo”, ho partisipasaun hosi Sekretáriu Estadu Pekuária, José Vieira de Araújo, ne’ebé ko’alia kona-ba polítika públika no mós dezafiu no prioridade prinsipál sira iha setór pekuária nian. 

Durante entrevista ne’e aborda kestaun sira ne’ebé relasiona ho vizaun Governu nian ba dezenvolvimentu setór pekuária, hasae produsaun animál, hadi’a saúde no sanidade animál, seguransa alimentár, no mós kontribuisaun pekuária (hakiak animál) ba dezenvolvimentu ekonómiku no sosiál komunidade rurál sira-nian.

Konversa ne'e mós foka ba medida sira ne'ebé hala'o daudaun hodi apoia produtór sira, kontrolu no prevensaun ba moras animál sira, jestaun ba kestaun kuarentena no sanidade animál, promosaun indústria pekuária, fortalesimentu ba sistema kooperativu produsaun no komersializasaun nian, no mós koordenasaun entre instituisaun públika no privada oioin ne'ebé envolve iha setór ne'e. Ko’alia mós kona-ba kestaun sira ne'ebé relasiona ho utilizasaun rai ba objetivu produsaun agropekuária no implementasaun programa dezenvolvimentu pekuária nian iha territóriu nasionál tomak. Aborda mós kona-ba dezenvolvimentu produsaun susu-been iha rai-laran no nia kontribuisaun potensiál ba hadi'a nutrisaun labarik nian, inklui integrasaun susu-been ne'ebé prodús iha rai-laran ba iha programa merenda eskolár.

Sekretáriu Estadu Pekuária nia kompeténsia mak atu tulun Ministru Agrikultura, Pekuária, Peska no Florestas iha definisaun, ezekusaun, koordenasaun no avaliasaun polítika públika sira ne’ebé relasiona ho setór pekuáriu, hodi asegura promosaun no fiskalizasaun ba produsaun no mós saúde animál, dezenvolvimentu indústria pekuária, no mós implementasaun medida sira ne’ebé nesesáriu ba kreximentu sustentável setór ne’e nian.

Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál sira Ezekutivu nian.

Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne'ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne'ebé hetan entrevista.

Epizódiu ho Sekretáriu Estadu Pekuária sei fó-sai iha tempu badak iha RTTL no mídia sosiál sira.

Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE