Governu Timor-Leste

Iha loron 26 fulan-maiu tinan 2026, iha Timor Plaza, Dili, Primeiru-Ministru, Kay Rala Xanana Gusmão partisipa iha Forum Emprezariál no Joven Emprendedór Ázia-Pasífiku, ne’ebé organiza hosi Konfederasaun Kámara Komérsiu no Indústria Ázia-Pasífiku (CACCI), Grupu Joven Emprendedór Ázia-Pasífiku (YEGAP), no Asosiasaun Nasionál Joven Emprendedór Timor-Leste (ANJET). Eventu ne’e halibur emprezáriu timoroan, lider emprezariál rejionál sira, parseiru dezenvolvimentu sira no reprezentantes hosi korpu diplomátiku hodi diskute kona-ba oportunidades ba kooperasaun ekonómika no promosaun empreendedorizmu joven. 

Iha ninia diskursu, Xefe Governu afirma katak "futuru sustentável ita-nia nasaun nian depende ba harii ekonomia ida ne’ebé forte no reziliente, kria empregu no fó oportunidade ba ita-nia joven sira atu harii sira-nia moris iha sira-nia rain rasik". Nia hatutan liu tan katak “Ha’u husu ba joven emprendedór timoroan sira atu foti risku, kria empreza no apoia dezenvolvimentu nasionál. Ita-boot sira-nia susesu maka nasaun nia susesu”.

Primeiru-Ministru destaka esforsu sira ne’ebé la’o daudaun hodi hametin setór privadu no kria kondisaun ba kreximentu ekonómiku nasionál, ho refere Timor-Leste nia adezaun ba Organizasaun Mundiál Komérsiu, kriasaun Banku Nasionál Dezenvolvimentu, no mós integrasaun plena iha ASEAN.

Kay Rala Xanana Gusmão subliña mós katak “adezaun ba ASEAN sei fó oportunidade ida hodi liga ita-nia emprezas, ita-nia emprendedór sira no ita-nia joven sira ba rejiaun ida ne’ebé dinámiku liu iha mundu” no fó-hanoin katak Timor-Leste rasik maka propoin atu sai uma-na’in ba Simeira ASEAN iha tinan 2029.

Durante forum ne’e asina memorandu entendimentu ida entre YEGAP no ANJET, ho objetivu atu hametin kooperasaun rejionál no habelar asesu joven emprendedór timoroan sira ba rede emprezariál internasionál.

Prezidente Kámara Komérsiu no Indústria Timor-Leste (CCI-TL), Jorge Serrano, hateten katak “investe iha joven emprendedór sira la’ós de’it atu apoia negósiu individuál; maibé atu harii baze ba tempu naruk ba ekonomia ida ne’ebé reziliente, diversifikadu no prósperu”. Nia mós defende polítika sira ne'ebé fasilita joven sira-nia asesu ba formasaun, mentoria (orientasaun), rede internasionál sira no finansiamentu.

Prezidente ANJET, Antoninho Junior Ximenes Guterres, afirma katak prezensa Primeiru-Ministru sai insentivu adisionál ba joven emprendedór nasionál sira atu kontinua dezenvolve sira-nia projetu emprezariál.

Forum ne’e inklui mós intervensaun hosi reprezentantes setór privadu rejiaun ne’e nian no parseiru internasionál sira kona-ba investimentu, integrasaun rejionál, inovasaun no kooperasaun ekonómika iha rejiaun Ázia-Pasífiku.