Governu Timor-Leste

Sekretáriu Estadu Formasaun Profisionál no Empregu, Bendito Freitas ho Embaxadora Estadu Unidus Amérika iha Timor-Leste, Judith R. Fergin, iha sesta-feira, loron 8 fulan Abril, asina Nota Entendimentu ida  hodi fó formasaun bázika kona-ba kursu kontruksaun nian ba Joven sira, liu-liu joven sira iha distritu Oe-Kusse liu hosi programa PAS (Prepara Ami ba Servisu).

Programa PAS ne’ebé oferese hosi Estadu Unidus Amérika fó benifísiu liu ba ita nia joven sira, liu-liu iha distritu Oe-Kusse, tanba bele kapasita sira no bele kanaliza sira ba iha kampu servisu nian, nune’e mós liu hosi formasaun ne'e bele tulun koñesimentu báziku joven sira nian, hodi partisipa ativu liu tan iha Planu Estratéjiku Dezenvolvimentu Nasionál, liu-liu kona-ba espansaun programa infra-estrutura servisu nian.”

Embaxadora Estadus Unidus Amérika iha Timor-Leste, iha ninia diskursu, hateten katak: “EUA sei kontinua suporta nafatin juventude sira, atu partisipa no kontribui ba dezenvolvimentu Nasaun nian. Tan ne’e mak objetivu hosi asina nota entendimentu ne’e, atu dezenvolve kapasitasaun rekursu umanu ba servisu na’in sira iha área rurál, liu-liu ba joven sira ne’ebé iha difikuldade atu kontinua sira nia estudu”

Programa PAS ne’e (Prepara Ami ba Servisu) hetan apoiu hosi ajénsia Internasionál Dezenvolvimentu Estadus Unidus Amérika, EDC (Education Development Centre) ho totál orsamentu hamutuk dólar tokon 5,5.