Governu lansa konstrusaun ba Sentru Konvensaun Internasionál iha Dili
Iha loron 20 fulan Maiu tinan 2026, realiza serimónia lansamentu fatuk dahuluk ba Sentru Konvensaun Internasionál, iha área antigu portu Dili, iha ámbitu komemorasaun Restaurasaun Independénsia ba da-24 no preparasaun Timor-Leste nian atu asume Prezidénsia ASEAN iha tinan 2029. 
Serimónia ne’e sura ho prezensa hosi Prezidente Repúblika, José Ramos-Horta, Primeiru-Ministru, Kay Rala Xanana Gusmão, Vise-Prezidente Parlamentu Nasionál, Duarte Nunes, membrus Governu, Sekretáriu-Jerál ASEAN, Kao Kim Hourn, Vise-Primeiru-Ministru no Ministru Defeza Austrália, Richard Marles, antigus Ministrus Negósius Estranjeirus Indonézia nian Hassan Wirajuda no Marty Natalegawa, korpu diplomátiku, no mós konvidadu sira seluk.
Projetu ne’e, hetan ona aprovasaun iha Konsellu Ministrus iha sorumutu loron 8 fulan-abril tinan 2026, ne’ebé prevee konstrusaun infraestrutura ida ne’ebé atu uza hodi hala’o sorumutu sira ASEAN nian durante Timor-Leste nia prezidénsia ba organizasaun ne’e, inklui simeira Xefe Estadu no Xefe Governu sira, nune’e mós eventu sira-seluk ho dimensaun boot.
Sentru Konvensaun Internasionál foun ne’e sei harii iha zona antigu portu nian, iha baía Dili nia sorin, no sei inklui edifísiu prinsipál ida ho sala konferénsia, auditórius no pavillaun sira ba espozisaun. Kompleksu ne’e sei inklui mós área komplementár sira lazer no turizmu nian, inklui paseiu ida hodi la’o iha kais nia sorin, akuáriu ida, no mós espasu ida ba entretenimentu no komérsiu.
Durante serimónia ne’e, Primeiru-Ministru afirma katak projetu ne’e nu’udar rezultadu hosi vizaun Governu Konstitusionál IX nian atu prepara Timor-Leste ba responsabilidade rejionál ne’ebé foun. “Iha tinan 2029, Timor-Leste sei prezide ASEAN, tanba ne’e ita iha-ne’e atu hahú vizaun no kompromisu ida-ne’e”, afirma Kay Rala Xanana Gusmão.
Sekretáriu-Jerál ASEAN, Kao Kim Hourn, hato’o parabéns ba lansamentu projetu ne’e no hateten katak Sentru Konvensaun Internasionál ne’e sei sai Plataforma ida ba diálogu, parseria no integrasaun rejionál, iha ámbitu preparasaun Timor-Leste nian ba Prezidénsia ASEAN iha tinan 2029.
Konstrusaun ne’e prevee sei konklui iha loron 20 fulan Maiu tinan 2028.
