Governu Timor-Leste

Iha loron 17 fulan-maiu tinan 2026, Prezidente Repúblika, José Ramos-Horta no Primeiru-Ministru, Kay Rala Xanana Gusmão, loke ofisialmente, Feira Nasionál iha Prasa Tasi-Tolu, Dili, nu’udar parte ida hosi komemorasaun Aniversáriu Restaurasaun Independénsia Timor-Leste nian ba da-24. 

Selebrasaun sira ne’e sei hala’o husi loron 17 to’o 20 fulan-maiu, ho lema “Hamutuk ita sei harii pátria ida ne'ebé justa, inkluziva no reziliente liután”, no inklui serimónia ofisiál, atividade kulturál, feira kulinária lokál, no mós konsertu muzikál iha Tasi-Tolu.

Iha abertura ofisiál Feira Nasionál ne’e, Prezidente Repúblika hato’o mensajen badak ida ba populasaun, no mós agradese ba komisaun organizadora no partisipante sira hotu. José Ramos-Horta hato’o parabéns ba povu timoroan, tantu iha rai-laran no mós iha rai-li’ur, ba aniversáriu Restaurasaun Independénsia, no konvida populasaun atu vizita feira ne’e.

Ministru Administrasaun Estatál no Prezidente Komisaun Organizadora, Tomás do Rosário Cabral, afirma katak loron 20 fulan Maiu “la’ós de’it data ida iha kalendáriu”, maibé “símbolu hosi sakrifísiu, mehi no determinasaun povu timoroan nian atu sai livre no soberanu”.

Programa komemorativu ne’e kontinua iha loron 19 fulan-maiu ho Misa Agradesimentu ida, iha Katedrál, Dili, tuir mai tau ai-funan hodi fó omenajen ba Erói sira, iha Semitériu Santa Krús.

Iha loron 20 fulan Maiu sei hala’o serimónia hasa’e no hatún Bandeira Nasionál iha Prasa Tasi-Tolu. Serimónia hasa’e bandeira sei hahú iha tuku 8 dadeer ho formatura forsas iha parada, tuir kedas ho xegada altas entidades Estadu nian no hasa’e Bandeira Nasionál iha tuku 9 dadeer. Serimónia hatún bandeira marka ona ba tuku 5 lokraik.

Programa ne’e sei taka iha loron 20 fulan-maiu ho enserramentu Feira Kulinária Lokál no konsertu muzikál, hahú hosi tuku 6 lokraik, iha Tasi-Tolu.

Feira ne’e sura ho partisipasaun hosi grupu kulinária 81 no mós artezaun no produtór 72, ho objetivu atu promove produtu lokál no kria espasu ba partisipasaun ekonómika populasaun nian.

Serimónia abertura ne’e konta ho partisipasaun hosi reprezentante órgauns soberania, membrus Parlamentu Nasionál, membrus Governu, reprezentantes F-FDTL no PNTL, komunidade lokál no konvidadu internasionál sira, inklui Sekretáriu-Jerál ASEAN, Kao Kim Hourn, no reprezentante sira hosi Austrália, Indonézia no mós  CPLP.

Abertura ba feira ne’e akompaña ho atuasaun hosi grupus kulturais no moradores Postu Administrativu Uatokarbau, Munisípiu Vikeke.