Governu Timor-Leste

Vise-Ministra ba Asuntus ASEAN no Lider Timor-Leste iha Sorumutu Reprezentantes Altu Nivel ASEAN (ASEAN–Timor-Leste SOM Leader) nian, Milena Rangel, lidera delegasaun nasionál iha Forum ASEAN-Austrália ba dala 38, ne’ebé hala’o iha loron 12 no 13 fulan-maiu tinan 2026 iha Sydney, Austrália. 

Ida-ne'e maka Timor-Leste nia partisipasaun dahuluk iha Forum ida-ne'e nu'udar membru plenu ASEAN nian, hafoin adezaun nasionál ba organizasaun rejionál ne’e iha fulan-outubru tinan 2025.

Forum ne’e prezide hamutuk hosi Austrália no Indonézia, ne’ebé ida-idak reprezenta hosi Vise-Sekretária Departamentu Negósius Estranjeirus no Komérsiu Austrália no Reprezentante Altu Nivel Austrália nian ba ASEAN, Michelle Chan, no Diretora-Jerál ba Kooperasaun ho ASEAN no mós Lider Indonézia iha Sorumutu Reprezentantes Altu Nivel ASEAN nian, Ina H. Krisnamurthi.

Sorumutu ne’e halibur reprezentantes  Altu Nivel ASEAN no Austrália nian hodi analiza  progresu relasaun ASEAN-Austrália no mós diskute kona-ba orientasaun kooperasaun iha futuru, iha tinan ne’ebé selebra aniversáriu Parseria Estratéjika Abranjente ASEAN-Austrália nian ba dala 5.

Durante  Forum ne’e, partisipante sira diskute kona-ba implementasaun Planu Asaun Parseria Estratéjika Abranjente ASEAN-Austrália nian ba períodu 2025–2029, nune’e mós asuntu rejionál no internasionál sira ne’ebé  sai  interese hamutuk.

Diskusaun ne’e  inklui  mós área kooperasaun sira ne'ebé relasiona ho pás, estabilidade no prosperidade rejionál, komérsiu bazeia ba regra,  kadeia abastesimentu sira ne'ebé reziliente, seguransa alimentár no enerjétika, no mós reforsa arkitetura rejionál ne'ebé lidera hosi ASEAN.