Governu Timor-Leste

Vise Primeiru-Ministru no Ministru Koordenadór Asuntus Sosiais, Mariano Assanami Sabino, afirma katak órgaun komunikasaun sosiál sira hala’o papél fundamentál ida iha konstrusaun Estadu iha país demokrátiku sira hanesan Timor-Leste, durante enserramentu Konferénsia Internasionál The Dili Dialogue Forum (DDF) 2026, ne’ebé hala’o iha loron 12 fulan-maiu tinan 2026, iha Dili, ho tema “Papél Média ba Futuru ida iha Pás”.

Iha nia intervensaun, governante ne’e apela ba profisionál mídia sira atu nafatin reflete kona-ba dezafius hosi setór ne’e, promove debate ideia no buka solusaun ba difikuldade sira ne’ebé hasoru bainhira hala’o servisu.

Mariano Assanami Sabino rekoñese katak dezafiu sira ne’ebé jornalista sira hasoru, inklui kestaun sira ne’ebé relasiona ho remunerasaun no kondisaun serbisu nian, no mós destaka kompromisu profisionál mídia sira-nian hodi divulga informasaun ne’ebé kredivel ba populasaun.

 “Ha’u hatene di’ak dezafius ne’ebé jornalista sira hasoru. Maske iha difikuldade sira kontinua serbisu loron no kalan hodi fornese informasaun sira ne’ebé kredivel ba populasaun. Nu’udar Vise-Primeiru-Ministru, koordena ho SEKOMS, ami sei kontinua apoia profisionál mídia sira”, nia afirma.   

Vise-Primeiru-Ministru insentiva  mós Konsellu Imprensa Timor-Leste atu reforsa koordenasaun ho órgaun komunikasaun sosiál sira no mós promove liután inisiativa formasaun ba jornalista sira, ho konsidera mudansa teknolójika no dezafiu sira ne’ebé hamosu hosi ambiente dijitál.

Durante forum ne’e, destaka katak média iha papél hodi promove debate públiku, liberdade espresaun no hanoin krítiku, ne’ebé kontribui ba konsolidasaun demokrasia no mós asesu populasaun nian ba informasaun faktuál no kredivel.

Rekomendasaun sira ne’ebé hato’o ona durante konferénsia ne’e inklui reforsu liberdade imprensa no liberdade espresaun, promosaun jornalizmu étiku no investigativu, kombate dezinformasaun (informasaun falsa) no sensasionalizmu, nune’e mós dezenvolve matadalan ba jornalizmu dame nian iha Timor-Leste.

Partisipante sira mós defende atu kontinua programas kapasitasaun jornalista nasionál nian liuhosi kooperasaun entre Konsellu Imprensa, instituisaun estatál, organizasaun internasionál, parseiru dezenvolvimentu no asosiasaun profisionál sira.

Dili Dialogue Forum organiza hosi Konsellu Imprensa Timor-Leste, ne’ebé hala’o dezde tinan 2017 nu’udar plataforma ida atu fahe esperiénsia kona-ba dezafiu no dezenvolvimentu setór komunikasaun sosiál iha Timor-Leste no rejiaun Sudeste Aziátiku.

Forum edisaun daualuk ne’e halibur reprezentante sira hosi órgaun komunikasaun sosiál, jornalista, editór, estudante universitáriu, membru Konsellu Imprensa, reprezentante organizasaun internasionál, no mós entidade nasionál no internasionál sira seluk.

Konferénsia ne’e loke husi Provedór Direitus Umanus no Justisa, Virgílio da Silva Guterres “Lamukan”, no sura mós intervensaun hosi konvidadu nasionál no internasionál sira kona-ba kna’ar mídia nian hodi promove pás, direitus umanus no demokrasia.