MMinistru Agio Pereira hala’o sorumutu ho Vise-Prezidente Seniór hosi Woodside Energy ba Greater Sunrise
Ministru Prezidénsia Konsellu Ministrus no Interlokutór iha diskusaun sira kona-ba Greater Sunrise, Agio Pereira, hasoru malu iha loron 14 fulan-maiu tinan 2026, iha Palásiu Governu Dili, ho Paul Sullivan, Vise-Prezidente Seniór hosi Woodside Energy ba dezenvolvimentu kampu Greater Sunrise, akompaña hosi Diretór Nasionál Woodside nian iha Timor-Leste, António dos Santos. 
Sorumutu ne’e ho objetivu atu analiza pontu situasaun projetu Greater Sunrise nian no reforsa koordenasaun entre Governu no Woodside iha ámbitu negosiasaun téknika, komersiál no regulatória ne’ebé la’o hela.
Iha enkontru ne’e, sira ko’alia kona-ba avansu foin lalais ne’e iha negosiasaun no mós evolusaun ba modelu dezenvolvimentu integradu ida, ne’ebé liga esplorasaun kampu ho infraestruturas ba prosesamentu iha rai-maran.
Ministru Agio Pereira subliña importánsia nasionál Greater Sunrise nian ba Timor-Leste, hodi destaka ninia ligasaun ba soberania nasionál, dezenvolvimentu Kosta Súl, no mós kriasaun baze ekonómika ida ne’ebé sustentável ba jerasaun sira iha futuru.
Durante sorumutu ne’e, analiza ona pasu sira tuirmai, inklui vizitas téknikas ba Kosta Súl no área Beasu nian, nune’e mós sorumutu sira tuirmai ho Primeiru-Ministru no entidade relevante sira hodi avansa ba negosiasaun.
Woodside, empreza enerjia australiana ida, integra iha konsórsiu dezenvolvimentu kampu Greater Sunrise (Sunrise Joint Venture) ho partisipasaun 33,44%, hamutuk ho TIMOR GAP ne'ebé kaer 56,6%, no Osaka Gas Australia ho partisipasaun 10%.
Kampu gás naturál no kondensadu Sunrise no Troubadour nian, ne'ebé koñesidu hamutuk hanesan kampu Greater Sunrise, lokaliza maizumenus kilómetru 150 iha sudeste Timor-Leste no kilómetru 450 iha norueste Darwin nian, iha Territóriu Norte, Austrália.
Estudu konsetuál independente ida ne’ebé hala’o iha tinan 2024 konfirma ona viabilidade ba opsaun dezenvolvimentu projetu Greater Sunrise iha Timor-Leste no ninia kontribuisaun ne’ebé potensiál ba ekonomia nasionál.
Dezenvolvimentu Greater Sunrise, inklui dada kadoras ba kosta súl, halo parte iha prioridades nacionais ne’ebé define ona hosi Governu IX ba kreximentu no dezenvolvimentu ekonómiku.
