Edisaun ba dala 22 hosi " Página do Governo " ko'alia kona-ba futuru ekonómiku Timor-Leste nian no dezafiu sira hosi reziliénsia sustentável
Edisaun ba da-22 tuirmai hosi programa “Página do Governo” nian sei hatudu diskusaun importante ida kona-ba futuru ekonómiku Timor-Leste nian, hodi halibur perspetiva internasionál no nasionál sira kona-ba reziliénsia, diversifikasaun, no dezenvolvimentu sustentável. Programa sei inklui partisipasaun hosi Diretór Ezekutivu hosi Fundu Monetáriu Internasionál (FMI), André Roncaglia, no hosi Governadór Banku Sentrál Timor-Leste (BCTL), Hélder Lopes, ne’ebé sei analiza impaktu hosi dezafiu ekonómiku mundiál sira ba ekonomia ki’ik sira no estratéjia sira ne’ebé presiza hodi hametin Timor-Leste nia estabilidade ba tempu naruk.
Iha konversa tomak, bainaka sira sei ko’alia kona-ba asuntu fundamentál sira hanesan inflasaun, knaar Fundu Mina-rai nian, dezenvolvimentu setór privadu, investimentu iha kapitál umanu no infraestrutura, no mós oportunidade sira ne’ebé relasiona ho agrikultura, ekoturizmu, no servisu dijitál sira. Debate ne’e mós destaka importánsia husi polítika fiskál ne’ebé di’ak, regulamentu finanseiru, no diversifikasaun ekonómika atu harii ekonomia ida ne’ebé reziliente no sustentável liu ba jerasaun sira iha futuru.
Programa ne’e promove hosi Gabinete Portavós Governu nian, lidera hosi Ministru Prezidénsia Konsellu Ministrus, Agio Pereira, programa "Página do Governo" ne’e halo produsaun iha parseria ho Rádiu no Televizaun Timor-Leste no mídia nasionál sira. Aprezenta hosi Nélia Chaves no ho Ika Moniz hanesan produtora ezekutiva, "Página do Governo" sai hanesan espasu ida ba diálogu institusionál, ne'ebé foka liu ba interese públiku nian, atubele garante populasaun sira-nia asesu ba asaun no desizaun prinsipál Ezekutivu sira nian.
Governu konvida sidadaun hotu-hotu atu akompaña edisaun foun “Página do Governo” ida-ne’e iha Sesta-feira ne’e, 15 Maiu 2026, tuku 8 kalan, iha RTTL no kanál mídia sosiál ofisiál sira.
