Ministru Komérsiu no Indústria Timor-Leste nian destaka ninia kompromisu ba integrasaun ekonómika rejionál no globál iha Fórum Komérsiu ADB-Banku Mundiál 2026
angkok, Tailândia, 12 Maiu 2026 - Ministru Komérsiu no Indústria Nino Pereira, hato’o Deklarasaun Espesiál durante sesaun Plenária Abertura Fórum Komérsiu ADB-Banku Mundiál 2026 ne’ebé hala’o iha Otél Kempinski iha Bangkok, Tailândia.
Fórum ne’e, organiza hosi Banku Dezenvolvimentu Aziátiku no Banku Mundiál iha kolaborasaun ho IMD Business School no Paris School of Economics, ho tema: “Polítika Komérsiu iha Mundu Fragmentadu: Adezaun sira, Polítika Industriál, no Multilateralizmu Foun.”
Iha diskursu, Ministru subliña katak, ambiente komérsiu globál atuál kontinua hasoru dezafiu signifikativu tanba inserteza polítika, medida polítika industriál, no tensaun jeopolítika. Nia subliña importánsia hosi kooperasaun, previzibilidade, no sistema komérsiu multilaterál ida ne’ebé bazeia ba regra sira.
Ministru destaka mós Timor-Leste nia adezaun istórika ba Organizasaun Mundiál Komérsiu nian iha tinan 2024 no ninia admisaun nu’udar membru plenu ba Asosiasaun Nasaun sira Sudeste Aziátiku nian iha tinan 2025 nu’udar marku prinsipál sira ba integrasaun ekonómika rejionál no globál ne’ebé kle’an liu.
Tanba ne’e, Ministru reafirma kompromisu Governu nian atu aliña polítika nasionál no enkuadramentu legál sira ho kompromisu rejionál, enkuantu promove diversifikasaun ekonómika, fasilitasaun komérsiu, koerénsia regulatória, kapasitasaun institusionál, no kreximentu ekonómiku inkluzivu.
Atu konklui, Ministru Nino Pereira reafirma Timor-Leste nia prontidaun atu hametin kooperasaun ho parseiru internasionál sira, inklui ADB no Banku Mundiál, hodi apoia sistema komérsiu rejionál no globál ne’ebé inkluzivu, reziliente, no sustentável liu.
(Notísia ida-ne'e iha hela prosesu edisaun)
