MJ hala’o konferénsia kona-ba Rejime Regulamentasaun Titularidade ba Sasán Imóvel sira
Ministériu Justisa, iha loron 14 fulan Abril tinan 2011, hala’o konferénsia iha Sentru Formasaun Jurídika, Kaikoli, hodi diskute kona-ba Dekretu-Lei Rejime Regulamentasaun Titularidade ba sasán Imóvel sira.
Dekretu-Lei ida ne’e mosu hodi hatán ba problema sira ne’ebé mosu husi programa levantamentu kadastrál ne’ebé Diresaun Nasionál Terra, Propriedade no Servisu Kadastrál (DNTPSC) hala’o hamutuk ho “Projetu Ita Nia Rai.
“Iha levantamentu kadastrál ne’e, to’o ohin loron halibur hamutuk ona deklarasaun rihun tolunulu resin hitu atus ida limanulu resin ualu (37.158) kona-ba rai pedasuk rihun tolunulu resin haat, atus ualu haatnulu (34.840), iha zona sidade sira iha distritu Aileu, Baucau, Bobonaro, Liquiça, Manatuto, Oe-cusse, Díli, Lautem, Ainaro no Covalima”, hateten Ministra Justisa Lucia Lobato
“Dadus hirak ne’e, hatudu mai ita katak hosi kazu sira ne’ebé laiha haksesuk-malu nia laran hamutuk pursentu 92, no kazu sira ne’ebé iha hela haksesuk-malu nia laran hamutuk pursentu 8. Dadus hirak ne’e bazeia ba dokumentu sira ne’ebé reprezenta na’in ba rai mai duni hosi deklarante sira,” hatutan Ministra.
Dekretu-Lei ne’ebé aprezenta hosi Ministra Justisa, iha hakarak ida atu rekoiñese direitu bá rai husi deklarante ema bain-bain, nune’e sira bele rejista ona sira nia direitu ida ne’e.
Haree ba importánsia tema nian, Prezidente Parlamento Nasionál, Fernando Lasama de Araújo hateten liu husi ninia aprezentasaun hateten: “Ha’u sei ko’alia ho komisaun A Parlamento Nasionál nian atu oinsá bele fó importánsia ba lei rai nian ne’ebé durante ne’e iha ona meza PN molok tama ba diskusaun Orsamentu Jerál Estadu nian ba tinan 2012”.
