Governu Timor-Leste

Sekretáriu Estadu Juventude no Desportu, Miguel Manetelu, iha kinta-feira,loron 14 fulan Marsu, simu vizita hosi Embaixadora EUA nian iha Timor-Leste, Judith Ryan Fergin. Vizita husi reprezentante diplomátika ne’e hodi ko’alia kona-ba apoiu ne’ebé mak Embaixada EUA atu fó ba iha área juventude nian.

“Sra. Embaixadora hato’o katak, sira (EUA) iha apoio balun ne’ebé mak atu oferese ba iha área juventude ninian, maibé Embaixadora ne’e la temi klaru kona-ba tipu hosi tulun sira ne’e, ne’e hanesan diskusaun dahuluk nian ne’ebé hala’o entre Embaixadora ho SEJD. Ne’e duni ita hein katak sei iha kontinuasaun diskusaun ne’ebé tékniku liu hodi haree atu oinsá bele servisu hamutuk, hodi dezenvolve juventude Timor-Leste nian”, hateten Sekretáriu Estadu.

Miguel Manetelu, mós hatutan tan katak, nia mós esplika ba Embaixadora kona-ba programa balun ne’ebé mak dezenvolve hela iha parte Juventude no Desportu nian. Iha tempu hanesan Embaixadora ne’e mós hateten katak, karik iha vizita ruma hosi militár EUA nian mai Timor-Leste, iha posibilidade atu servisu hamutuk hodi organiza atividade desportiva nian.