Ministru Bendito dos Santos Freitas partisipa iha sorumutu ministeriál ASEAN nian iha Cebu
Ministru Negósius Estranjeirus no Kooperasaun, Bendito dos Santos Freitas, iha loron 7 fulan-maiu tinan 2026, partisipa iha Sorumutu Ministrus Negósius Estranjeirus ASEAN (AMM), iha Sorumutu Konsellu Komunidade Polítika-Seguransa ASEAN (APSC) nian ba dala 31, ne’ebé hala’o iha Cebu, Filipinas, iha ámbitu Prezidénsia Filipinas nian ba ASEAN 2026, no ne'ebé maka akontese ona molok Simeira ASEAN ba dala 48, ne'ebé sei hahú ofisialmente iha loron 8 fulan-maiu tinan 2026. 
Iha Sorumutu Ministrus Negósius Estranjeirus ASEAN, partisipante sira troka opiniaun kona-ba dezenvolvimentu rejionál no internasionál, konstrusaun Komunidade ASEAN, integrasaun Timor-Leste hafoin adezaun plena ba organizasaun ne’e, implementasaun Konsensu Pontu Lima kona-ba Myanmar, no mós futuru mekanizmus ne’ebé lidera husi ASEAN.
Iha reuniaun ne’e, Ministru Bendito reafirma Timor-Leste nia kompromisu atu kontribui ho konstrutivu ba objetivu komún ASEAN nian kona-ba pás, estabilidade, reziliénsia no integrasaun rejionál. Nia subliña mós importánsia atu transforma Vizaun Komunidade ASEAN 2045 sai rezultadu konkretu, ne’ebé sentradu iha povu, hodi defende reforsu koordenasaun ida entre pilár oioin ASEAN nian, koerénsia institusionál, no kooperasaun rejionál atu hatán ba dezafiu sira ne’ebé mosu.
Ministru Bendito mós reafirma Timor-Leste nia rekoñesimentu kona-ba kontinuasaun apoiu hosi Estadus-Membrus ASEAN no Sekretariadu ASEAN ba prosesu integrasaun plena nasaun nian iha organizasaun ne’e. Nia mós relata katak Timor-Leste dezenvolve hela Roteiru Nasionál Tinan Lima ba Implementasaun Kompromisus Komunidade Ekonómika ASEAN ba períodu 2026–2030.
Kona-ba situasaun iha Myanmar, Ministru Bendito reafirma Timor-Leste nia apoiu ba Konsensu Pontu Lima ASEAN nu’udar kuadru referénsia atu rezolve situasaun iha nasaun ne’e, no defende abordajen ida ne’ebé pragmátika, fazeada, no orientada ba rezultadus.
Iha Sorumutu Konsellu Komunidade Polítika-Seguransa ASEAN (APSC) ba dala 31, Ministru sira analiza implementasaun Planu Estratéjiku Komunidade Polítika-Seguransa ASEAN iha ámbitu Vizaun Komunidade ASEAN 2045, no mós dezenvolvimentu foin lalais ne’e no inisiativa sira ne’ebé la’o hela iha pilár polítiku-seguransa ASEAN.
Sorumutu ne’e mós ko’alia kona-ba esforsu ASEAN atu hametin pás, estabilidade, diálogu, kooperasaun, no harii komunidade rejionál iha kontestu internasionál ida ne’ebé kompleksu ba beibeik, no mós analiza Relatóriu Anuál 2025 husi Institutu ASEAN ba Pás no Rekonsiliasaun (ASEAN-IPR).
Ministru Bendito mós marka prezensa iha Jantár Boazvindas ne’ebé organiza husi Sekretária Negósius Estranjeirus Filipinas, Ma. Theresa P. Lazaro, iha loron 5 fulan-maiu, ne’ebé halibur Ministrus Negósius Estranjeirus ASEAN, altus funsionárius no Sekretáriu-Jerál ASEAN nian.
