Governu Timor-Leste

Ministru Juventude, Desportu, Artes no Kultura, Nelyo Isaac Sarmento, partisipa iha Sorumutu Ministeriál Sudeste Aziátiku kona-ba Juventude no Desportu 2026, ne’ebé realiza hosi loron 3 to’o 5 fulan-maiu, iha Bali, Indonézia, ho objetivu atu hametin kooperasaun rejionál iha área juventude no desportu. 

Enkontru ne’ebé organiza husi Ministériu Juventude no Desportu Indonézia nian, halibur ministru no reprezentante governamentál sira husi país Sudeste Aziátiku ho tema “Reforsa Kolaborasaun Juventude iha Sudeste Aziátiku no Diplomasia Desportiva ba Futuru ida ne’ebé Reziliente”.

Durante reuniaun ne’e, partisipante sira diskute kona-ba reforsu kooperasaun rejionál iha dezenvolvimentu juventude, diplomasia desportiva, dezenvolvimentu talentu, profisionalizasaun ekosistema desportivu no fortalesimentu sistema desportu ho prestasaun aas.

Iha sesaun plenária, Timor-Leste refirma kompromisu atu kontinua serbisu hamutuk ho país sira iha rejiaun ne’e hodi dezenvolve kapasidade joven sira nian no setór desportivu nasionál, ho objetivu atu hametin partisipasaun no kompetitividade iha nivel rejionál no internasionál.

Sorumutu ministeriál termina ho adosaun Deklarasaun Bali, dokumentu ne’ebé asina husi ministru partisipante sira, ne’ebé estabelese kompromisu komún hodi reforsa kooperasaun rejionál iha área juventude no desportu, promove pás no solidariedade rejionál liuhusi desportu, no mós apoia dezenvolvimentu sustentavel no inkluzaun sosiál.

Durante enkontru ne’e, Nelyo Isaac Sarmento hasoru malu ho nia omólogu indonéziu, Erick Thohir, hodi diskute oportunidade kooperasaun entre país rua ne’e iha setór desportivu.

Iha sorumutu ne’e, ministru rua ne’e ko’alia kona-ba dezenvolvimentu pencak silat, modalidade tradisionál indonézia nian ne’ebé pratika makaas iha Timor-Leste, nune’e mós posibilidade ba kooperasaun iha área indústria desportiva no apoiu tékniku ba dezenvolvimentu atleta timoroan sira.