Governu Timor-Leste

Primeiru-Ministru, Kay Rala Xanana Gusmão hala’o vizita ofisiál ida ba Brunei Darussalam, husi loron 3 to’o loron 5 fulan-maiu tinan 2026, iha ne’ebé simu husi Sua Majestade Sultaun Haji Hassanal Bolkiah Mu’izzaddin Waddaulah, iha Istana Nurul Iman, Bandar Seri Begawan. 

Ne’e hanesan vizita dahuluk ba Brunei Darussalam dezde Timor-Leste nia adezaun plena ba ASEAN, iha loron 26 fulan-outubru tinan 2025, ho objetivu atu hametin relasaun bilaterál no hakle’an kooperasaun setoriál.

Iha enkontru ne’e, Sua Majestade Sultaun hato’o parabéns ba Governu no povu Timor-Leste tanba hetan ona adezaun plena ba ASEAN no reafirma kompromisu Brunei Darussalam nian atu kontinua apoia Timor-Leste iha ninia preparasaun ba prezidénsia no organizasaun Simeira ASEAN nian iha tinan 2029.

Primeiru-Ministru agradese ba apoiu ne’ebé Brunei Darussalam fó durante prosesu adezaun Timor-Leste ba ASEAN no subliña importánsia husi kooperasaun rejionál, unidade ASEAN, no mós respeitu ba direitu internasionál.

Iha ámbitu vizita ne’e, asina ona Memorandu Entendimentu tolu entre Governu rua ne’e, iha área enerjia, saúde no estabelesimentu mekanizmu konsultas bilaterais ida entre Ministérius Negósius Estranjeirus. Memorandu Entendimentu kona-ba kooperasaun enerjétika asina husi Ministru Petróleu no Rekursus Minerais, Francisco da Costa Monteiro. Akordu iha área saúde asina husi Ministra Saúde, Élia António de Araújo dos Reis Amaral. Memorandu Entendimentu kona-ba konsultas bilaterais asina husi Ministru Negósius Estranjeirus no Kooperasaun, Bendito dos Santos Freitas.  Akordu hirak-ne’e reflete kompromisu komún ida atu hakle’an kolaborasaun institusionál, promove parseria setoriál, no mós muda vontade polítika ne’ebé forte sai rezultadu ne’ebé konkretu no reál ba país rua ne’e.

Hafoin serimónia ne’e, Sua Majestade Sultaun oferese almosu ofisiál ida hodi fó onra ba Primeiru-Ministru, Xanana Gusmão ho prezensa membrus Família Real no delegasaun Timor-Leste nian.

Delegasaun Timor-Leste inklui Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay; Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino; Ministru Negósius Estranjeirus no Kooperasaun, Bendito dos Santos Freitas; Ministru Petróleu no Rekursus Minerais, Francisco da Costa Monteiro; Ministra Saúde, Élia António de Araújo dos Reis Amaral; Vise-Ministra ba Asuntus ASEAN, Milena Rangel; Sekretáriu Estadu Komunikasaun Sosiál,  Expedito Ximenes; Embaixadór Timor-Leste ba Brunei Darussalam, Abel Guterres; no Xefe Gabinete Primeiru-Ministru nian, Elizabeth Exposto.

Hosi loron 7 to’o 9 fulan-maiu, Primeiru-Ministru lidera delegasaun nasionál iha Simeira ASEAN ba da-48, ne’ebé sei realiza iha Cebu, Filipinas.