Governu Timor-Leste

Ministru Negósius Estranjeirus no Kooperasaun, Bendito dos Santos Freitas, partisipa iha Sorumutu Ministeriál ASEAN-Uniaun Europeia (AEMM) ba dala 25, ne’ebé hala’o iha loron 27 no 28 fulan-abríl tinan 2026, iha Bandar Seri Begawan, Brunei Darussalam. 

Sorumutu  bienál (tinan rua nian) ne’e halibur Ministrus Negósius  Estranjeirus hosi Estadus-Membrus ASEAN no Uniaun Europeia, nune’e mós reprezentantes hosi Sekretariadu ASEAN, ho objetivu atu avalia pontu situasaun hosi relasaun diálogu ASEAN-UE no define orientasaun sira hodi hametin parseria estratéjika entre rejiaun rua ne’e.

Durante reuniaun ne’e, analiza avansu sira iha kooperasaun ASEAN-UE, inklui implementasaun ba Planu Asaun ASEAN-UE  (2023–2027), ho inisiativas iha área konektividade sustentável, transformasaun dijitál, tranzisaun enerjétika, edukasaun, komérsiu no investimentu. Delegasaun sira troka mós hanoin kona-ba kestaun rejionál no internasionál ne'ebé sai interese komún, ho destaka importánsia hosi multilateralizmu no orden internasionál ida ne'ebé bazeia ba regras.

Sorumutu ne’e ko’alia mós kona-ba preparasaun ba selebrasaun aniversáriu relasaun diálogu ASEAN-Uniaun Europeia nian ba dala 50, ne’ebé sei hala’o iha tinan 2027, nune’e mós kona-ba adosaun Deklarasaun Ministeriál Konjunta, ne’ebé reafirma sentralidade ASEAN no kompromisu atu hametin kooperasaun iha pilár tolu Komunidade ASEAN nian, aliña ho vizaun ASEAN 2045.

Durante sorumutu ne’e, Ministru Bendito dos Santos Freitas hala’o sorumutu bilaterál ho omólogu sira hosi ASEAN no Estadus-Membrus Uniaun Europeia nian, ho objetivu atu hametin relasaun bilaterál no identifika área kooperasaun sira ne’ebé sai interese komún.