Estudante husi eskola públika, inklui hosi área remota, manán prémiu internasionál kona-ba kriatividade no inovasaun
Grupu estudante timoroan ida husi ensinu báziku no sekundáriu, maioria mai husi eskola públika, inklui mai hosi área rurál no remota, manán prémiu oin-oin iha kompetisaun International Creativity and Innovation Award (ICIA), ne’ebé realiza iha fulan-abríl tinan 2026, iha Kamboja, ho partisipasaun online no prezensiál. 
Atividade ne’e organiza husi Ministériu Edukasaun, liuhusi Komisaun Nasionál Timor-Leste ba UNESCO, servisu hamutuk ho diresaun ensinu báziku no sekundáriu. Ho totál grupu estudante sanulu maka hetan nomeasaun hodi reprezenta eskola husi Dili, Aileu, Baukau, Vikeke no Likisá.
Kompetisaun ne’e halibur partisipante sira husi país 27 iha Amérika Latina, Europa, Ázia no Médiu Oriente, ne’ebé fahe entre modalidade online no prezensiál.
Iha kompetisaun online ne’ebé hala’o iha loron 11 fulan-abríl ne’e, estudante timoroan sira kompete hasoru partisipantes husi nasaun 14 no konkista medalla osan-mutin tolu no bronze tolu. Prémiu sira ne’e fó ba grupu hosi Escola Sekundária Jerál Públika n.º 1 Baukau, Eskola Sekundária Jerál Públika n.º 1 Likisá, Escola Sekundária Jerál Públika Finantil Dili, Eskola Sekundária Jerál Públika 4 Setembru Vikeke, Eskola Bázika Sentrál Dom Baumeta (Aileu) no Eskola Bázika Sentrál 3 Fatumeta (Dili).
Iha kompetisaun prezensiál, Timor-Leste mós hetan rezultadu ne’ebé destakadu entre nasaun 13 ne’ebé partisipa. Grupu ida hosi Eskola Bázika Katólika Santo António Teulale iha Baukau manán Grand Award, distinsaun Titanium, no prémiu Top 10 Challenge ne'ebé fó hosi Ministériu Ambiente Kamboja nian, ho projetu ida iha área estatístika ne'ebé aplika ba resiklajen.
Grupu timoroan sira seluk mós hetan prémiu, inklui estudante sira husi Eskola Bázika Sentrál Dom Baumeta Aileu, ne’ebé hetan medalla osan-mutin ho projetu bioplástiku ida ne’ebé prodús husi materiál doméstiku, no mós grupu seluk husi Eskola Bázika Katólika Santo António Teulale iha Baukau, ne’ebé konkista medalla bronze ho projetu ida kona-ba sekuénsias numérikas iha padraun tradisionál.
Partisipasaun nasionál hetan mós rekoñesimentu iha kategoria manorin, ho atribuisaun prémiu “Teach Me Award” (Top 3) ba profesora Zélia Alves da Cruz, husi Eskola Bázika Sentrál Dom Baumeta, Aileu.
Rezultadu ne’ebé sira hetan reflete partisipasaun estudante sira nian husi kontestu edukativu oin-oin, inklui área rurál no hatudu envolvimentu husi eskola públika sira iha inisiativas internasionál hodi promove kriatividade no inovasaun.
