Governu Timor-Leste

Ministériu Ensinu Superiór, Siénsia no Kultura (MESSK), iha loron 27 fulan-abríl tinan 2026, iha Dili, asina akordu ida ho Fundação Universitária Ibero-Americana (FUNIBER) hodi fó bolsa-estudu mestradu no doutoramentu ba dosentes hosi instituisaun ensinu superiór sira iha Timor-Leste, ho objetivu atu reforsa kualifikasaun akadémika no kapasidade sistema universitáriu nasionál. 

Akordu ne’e formaliza iha serimónia ida ne’ebé hala’o iha instalasaun MESSK nian, ho prezensa hosi Vise-Primeiru-Ministru no Ministru Koordenadór Asuntus Sosiais, ne’ebé ezerse hela kna’ar nu’udar Ministru Ensinu Superiór, Siénsia no Kultura interinu, Mariano Assanami Sabino, no mós reprezentantes hosi FUNIBER no instituisaun ensinu superiór oioin.

Inisiativa ne’e halo parte iha esforsu Governu nian hodi reforsa ensinu superiór no promove kualifikasaun rekursus umanus, tuir prioridade dezenvolvimentu nasionál no mós integrasaun rejionál Timor-Leste nian iha ASEAN.

Akordu ne’e, iha faze inisiál abranje instituisaun ensinu superiór lima: Universidade Nacional Timor Lorosa’e (UNTL), Universidade Católica Timorense (UCT), Universidade Dili (UNDIL), Dili Institute of Technology (DIT) no Institute of Business (IOB), ho planu atu koordena direta ho instituisaun ida-idak ba selesaun no nomeasaun ba dosente kandidatu sira.

Bolsa-estudu sei finansia hosi FUNIBER no destina ba programa mestradu no doutoramentu, inklui modalidade ensinu ho distánsia do’ok, hodi nune’e dosente sira bele nafatin hala’o sira-nia atividade profisionál iha Timor-Leste bainhira hala'o sira-nia estudu. Área estudu sira maka saúde, jestaun, direitu, turizmu, administrasaun no sira seluk.

Durante serimónia ne’e, Mariano Assanami Sabino destaka katak akordu ne’e sei kontribui hodi hasa’e kapasidade dosente sira-nian no atu hadi’a kualidade ensinu superiór, no mós subliña nesesidade hodi aliña formasaun akadémika ho padraun rejionál no internasionál.

Diretór Relasaun Institusionál FUNIBER nian, Frigdiano Álvaro Durantez Prados, hateten katak kooperasaun ne’e ho objetivu atu promove formasaun avansada ba dosente universitáriu sira no integra Timor-Leste iha rede akadémika ida ne’ebé inklui país lian portugeza no país lian española sira, hodi hametin ligasaun entre espasu ibero-amerikanu no rejiaun Ázia-Pasífiku.

Akordu ne’e mós prevee katak instituisaun ensinu superiór sira sei propoin kandidatus ba bolsa-estudu, tuir kritériu ne’ebé define ona, no númeru bolsa-estudu nian sei determina iha ámbitu implementasaun programa ne’e.

Serimónia ne’e inklui mós asina memorandu entendimentu entre FUNIBER ho universidade nasionál oioin, hodi formaliza kooperasaun direta iha área ensinu superiór.