Ministru Administrasaun Estatál fó pose ba estrutura foun Autoridade RAEOA
Iha loron 28 fulan-abríl tinan 2026, Ministru Administrasaun Estatál, Tomás do Rosário Cabral, fó fose ba estrutura foun Autoridade Rejiaun Administrativa Espesiál Oekusi Ambenu (RAEOA) nian, iha serimónia ida ne’ebé hala’o iha Salaun Konvensaun Alfándega Palaban, iha Oekusi. 
Estrutura foun ne’e inklui Prezidente Autoridade, Sekretáriu Rejionál na’in-tolu no Diretór Servisu Rejionál na’in-21, ho totál membru na’in-24, ne’ebé responsavel hodi hala’o servisu governu nian iha rejiaun ne’e.
Régio da Cruz Salu simu pose nu’udar Prezidente Autoridade RAEOA. Kargu Sekretáriu Rejionál sira asume hosi Salvador da Cruz, ba área Administrasaun no Finansas, Francisco Loca, ba área Planeamentu no Dezenvolvimentu, no mós Merita Marques Lafo, ba área Asuntu Sosiál no Organizasaun Komunitária.
Fó mós pose ba Diretór Servisu Rejionál sira iha área Administrasaun no Rekursus Umanus, Planeamentu Integradu no Dezenvolvimentu, Finansas, Patrimóniu no Lojístika, Aprovizionamentu, apoiu ba organizasaun naun-governamentál no komunitária, Edukasaun, Saúde, Seguransa Alimentár, Obras Públikas, Bee no Saneamentu Ambientál, Agrikultura, Merkadu no Turizmu, Asaun Sosiál, Protesaun Sivíl no Jestaun Dezastre, Rejistu Sivíl no Notariadu, Transportes no Komunikasoins, Komérsiu no Indústria, Terras no Propriedade, no mós Ajénsia Planeamentu no Fiskalizasaun.
Nomeasaun ba estrutura foun ne’e mai hosi desizaun Konsellu Ministrus iha loron 22 fulan-abríl, ne’ebé aprova ona ezonerasaun ba dirijente anteriór sira no dezignasaun responsavel foun sira ba kargus iha Autoridade RAEOA.
Iha nia diskursu, Ministru Administrasaun Estatál fó instrusaun ba responsavel foun sira atu asegura funsionamentu servisu no atu prepara ba realizasaun Konsulta Sidadania ne’ebé marka ona ba tinan ida-ne’e, ho destaka importánsia aproximasaun ba komunidade no mós hala’o knaar sira hodi serbí populasaun.
Ministru afirma mós katak Dekretu-Lei n. 20/2026 determina sesaun estatutu ZEEDOA nian iha RAEOA, ba oin mekanizmu foun maka sei regula organizasaun servisu rejionál sira, inklui Fundu Espesiál Dezenvolvimentu.
Iha serimónia ne’e hetan partisipasaun hosi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, Vise-Ministru Asuntus Parlamentares, Adérito Hugo da Costa, Vise-Ministru Komérsiu, Augusto Júnior Trindade, membrus Parlamentu Nasionál, Komisaun Funsaun Públika, entidades hosi Defeza no Seguransa, reprezentantes hosi setór privadu, no mós komunidade lokál.
